Ikën gjyqtarja, Banda e Durrësit shtyhet për herë të tretë në Apel

Anëtarët e Bandës së Durrësit në gjykatë

TIRANE Procesi gjyqësor në ngarkim të të akuzuarve si anëtarë të bandës së Durrësit në Apelin e Krimeve të Rënda nuk doli as dje nga ngërçi i futur për shkak të gjyqtarëve. Për të tretën herë, procesi nuk u zhvillua për shkak të mosformimit të trupës gjykuese. Në seancën e djeshme, nga ana e trupit gjykues u relatua se gjyqtarja Fiqirete Mullai, e deleguar nga Këshilli i Lartë i Drejtësisë si kryesuese në këtë gjykim, kishte paraqitur dorëheqjen. Siç u relatua në proces, dorëheqja ishte paraqitur ditën e premte dhe ajo ishte pranuar nga kreu i Gjykatës së Apelit për Krimet e Rënda, duke e lënë kështu me një gjyqtar mangët pesëshen gjykuese të bandës. Pamundësia për të formuar një pesëshe gjykuese po mban peng prej disa seancash gjykimin e bandës së Durrësit në Apelin për Krimet e Rënda. Pesëshja fillestare, e përbërë nga anëtarë të trupës gjykuese të Apelit, u dorëhoq për shkak të papajtueshmërive. Ata ishin konsumuar, pasi kishin marrë pjesë në shqyrtimin e masave të sigurisë apo të kërkesave të ndërmjetme teksa banda gjykohej në Shkallën e Parë. Por, në vijim, delegimi i pesë gjyqtarëve të tjerë nga Gjykata e Apelit Tiranë rezultoi i suksesshëm. Sipas ligjit, nëse një gjyqtar ka marrë në shqyrtim një akuzë apo një kërkesë për një të pandehur, nuk mundet që të shqyrtojë çështje të tjera për të njëjtin person.