Incidentet, situate e qete ne veri
Gjendja ne veriun e Kosoves eshte plotesisht ne kontroll, konfirmuan dje autoritetet me te larta vendore e nderkombetare ne Prishtine. Komandanti i KFOR-it, gjenerali Havier de Marnhak, shefi i UNMIK-ut, Joakim Ryker dhe Kryeministri Hashim Thaci, diskutuan per situaten ne veri te vendit, pas sulmeve te djeshme te protestuesve ne pikat doganore te Kosoves ne vendkalimet kufitare ne Jarinje (Leposaviq) dhe Banje (Zubin-Potok), te cilat jane mbyllur. “Ne po shqyrtojme mundesine e hapjes se ketyre portave sapo te krijohen kushte per kete”, tha gjenerali De Marnhak. “Te gjithe duhet te jene te vetedijshem per vendosmerine tone per te ruajtur dhe riperterire mjedisin e qete e te sigurt ne Kosove”, theksoi ai. De Marnhak kritikoi drejtuesit lokale ne veri per veprimet e tyre. “Disa drejtues lokale moren dje nje pergjegjesi te madhe, duke perfshire ne keto veprime gra dhe femije dhe duke rrezikuar keshtu jetet e tyre. Fatmiresisht, nuk ndodhi me e keqja, por drejtuesit duhet te mendojne mire kur bejne demonstrata te tilla”, tha komandanti i KFOR-it.
Shefi i UNMIK-ut, Ryker, sqaroi se qellimi i tyre eshte kthimi ne kushte normale dhe se Kosova "nuk eshte mbyllur" nga mbyllja e dy vendkalimeve ne veri, sepse portat e tjera jane te hapura. “Qellimi yne eshte te kthehemi ne rrethana normale sa me shpejt te jete e mundur, pra qe atje te kthehen policia dhe doganat. Kjo do te behet ne momentin kur te vleresohet se jane arritur kushtet per veprimtari normale ne keto pika kalimi dhe mendojme se kjo do te behet shpejt”, theksoi Ryker.
Sipas Kryeministrit Thaci, keto jane incidente te vecuara dhe gjendja e sigurise ne gjithe territorin e Kosoves eshte e qete. “Jane incidente te vecuara dhe pa asnje ndikim ne realitetin pozitiv kosovar. Qytetaret e Kosoves vazhdojne jeten e tyre normale, vazhdojne ndertimin e perspektives se perbashket”, evidentoi Thaci.
Ne shenje proteste kunder deklarates se pavaresise se Kosoves, serbe te zemeruar shkaterruan pardje dy vendkalimet kufitare veriore me Serbine, Jarinja (Leposaviqi) dhe Banja (Zubin-Potoku). Ato u sulmuan nga grupe protestuesish dhe pasi u shkaterruan iu vu flaka. Gjithashtu dogjen 10 vetura te SHPK-se dhe UNMIK-ut. KFOR-i dhe UNMIK-u kane mbyllur pikat e sulmuara per 24 ore dhe ngriten dy postblloqe te reja.