Inflacioni në revan

Kostoja e jetesës së qytetarëve vazhdon të shënojë rritje të larta. Instituti i Statistikave ka publikuar rritjen e inflacionit, i cili për muajin mars është regjistruar 4.6 për qind, apo 1.9 për qind më i lartë se një vit më parë. Ekspertë të ekonomisë e shikojnë me mjaft shqetësim këtë rritje të lartë të çmimeve, ku sipas tyre, akoma më i keq mbetet fakti që viti 2008 do të karakterizohet nga rritje të tjera çmimesh. Ish-drejtoresha e Institutit të Statistikave, Milva Konomi, tha për gazetën, “ Korrieri” se çmimet e larta reflektojnë mungesën e prodhimit vendas dhe rritjes së çmimit të energjisë. Sipas Konomit, kjo situatë do të vazhdojë të reflektohet edhe në muajt në vazhdim. “Situata në drejtim të çmimeve paraqitet kritike. Shkaku i kësaj situate mbetet rritja e lartë e çmimeve në tregjet ndërkombëtare të produkteve ushqimore dhe të karburanteve. Por, nga ana tjetër, ne nuk duhet të harrojmë faktin se importi i produkteve ushqimore zë një vend të konsiderueshëm në këtë strukturë. Gjithashtu, kjo tregon qartazi se tek ne mungon prodhimi vendas”, sqaron Konimi. Po ashtu, ish-drejtoresha e Institutit të Statistikave thekson se thellimi i deficitit tregtar do të shoqërohet me rritje të vazhdueshme të çmimeve. “Po të shikojmë treguesit e eksporteve dhe importeve, konstatohet se janë regjistruar rritje të vëllimit të tyre. Por duke qenë se vendi ynë eksporton metale, çmimi i tyre është shumë herë më i ulët se çmimi i produkteve ushqimore apo dhe karburanteve që ne importojmë. Pra, në këtë mënyrë është e pamundur që ky lloj raporti të kryejë kompensimin”, shton Konomi, duke nënvizuar se edhe niveli i lartë i deficitit buxhetor ndikon në rritjen e çmimeve. Sipas saj, në këtë situatë Banka e Shqipërisë duhet tregojë kujdesin për ruajtjen e normës së inflacionit brenda parametrave të lejuar. 

Rritet zhvlerësimi i pagave dhe pensioneve    

Për muajin mars inflacioni ka regjistruar nivelin e tij më të lartë në këto 10 vitet e fundit. Inflacioni i lartë ka ardhur si rezultat i rritjes së çmimit të energjisë dhe importit të lartë të produkteve ushqimore. Sipas INSTAT-it, indeksi i çmimeve të konsumit në muajin mars 2008 arriti 102.4 për qind, kundrejt muajit dhjetor 2007 (dhjetor 07=100), duke shënuar një rritje prej 0.9 për qindësh krahasuar me muajin e kaluar. Ndryshimi vjetor në muajin mars është 4.6 për qind. Një vit më parë ky ndryshim ishte 2.7 për qind.

Indeksi i grupit “Ushqime dhe pije joalkoolike” shënoi një rritje prej 0.7 për qindësh, me një ndikim prej 0.3 për qindësh në totalin e ndryshimit mujor. Brenda këtij grupi rritja më e madhe prej 4.8 për qindësh vërehet në nëngrupin “fruta”. Këtu mund të përmendim rritjet e çmimeve të kivit me 16.9 për qind, mollëve me 5.4 për qind, portokalleve me 4.4 për qind dhe bananeve me 3.7 për qind. Indeksi i  nëngrupit “zarzavate, përfshirë patatet” shënoi një rritje prej 1.0 për qindësh, ku mund të përmendim rritjet e çmimit të lulelakrës me 31.4 për qind, lakrës me 24.6 për qind, domateve me 10.5 për qind etj. Gjatë muajit mars, çmimet janë rritur edhe në disa nëngrupe të tjera të këtij grupi, ku mund të përmendim rritjet në nëngrupet, “vajra dhe yndyrna” me 0.5 për qind, “bukë e drithëra” me 0.5 për qind, peshk” me 1.2 për qind. Ndërsa çmimet në nëngrupin “qumësht djathë e vezë” shënuan një ulje prej 0.5 për qindësh. Indeksi i grupit “Veshje dhe këpucë” shënoi një ulje prej 0.8 për qindësh, duke pasur një ndikim prej - 0.04 për qindësh në totalin e ndryshimit mujor. Indeksi i grupit “Qira, ujë, lëndë djegëse dhe energji” shënoi një rritje prej 3.8 për qindësh, duke pasur një ndikim prej 0.6 për qindësh në totalin e ndryshimit mujor. Çmimi i energjisë elektrike në muajin mars 2008 shënoi një rritje prej 23.7 për qindësh. Indeksi i grupit “Transport” shënoi një rritje prej 0.8 për qindësh, duke pasur një ndikim prej 0.05 për qindësh në totalin e ndryshimit mujor. Gjatë muajit mars çmimi i naftës shënoi një rritje prej 1.4 për qindësh dhe çmimi i benzinës u rrit me 0.5 për qind.

Rritja e çmimeve:

Ushqime dhe pije joalkoolike                   0.7 për qind                 

Vaji                                                      0.5 për qind

Buka                                                    0.5 për qind

Energjia elektrike                                  23.7 për qind

Nafta                                                    1.4 për qind

Benzina                                                0.5 për qind

Qira, ujë, lëndë djegëse                         3.8 për qind

Fruta                                                    4.5 për qind

Kivit                                                     16.9 për qind

Mollët                                                  5.4 për qind

Portokallet                                            4.4 për qind