Investim në nënstacionin e Kuçovës, Balluku: Energji pa ndërprerje dhe me cilësi të lartë
TIRANË, 9 prill /ATSH/ Zëvendëskryeministrja, njëherësh ministre e Infrastrukturës dhe Energjisë, Belinda Balluku, deklaroi se, çdo investim në sektorin energjetik ka në fokus përmirësimin e cilësisë së furnizimit, por edhe uljen e humbjeve në rrjet.
Përmes një videomesazhi Balluku tha se, “investimi në nënstacionin e ri elektrik të Kuçovës, synon fuqizimin e rrjetit për t’i ofruar shërbim mbi 15 500 abonentëve. Një shërbim për furnizimin me energji pa ndërprerje dhe me cilësi të lartë”.
Balluku tha se, “është shumë e rëndësishme që teksa fuqizojmë furnizimin, nga ana tjetër ulim humbjet teknike, që në 2013, i gjetëm në nivelin 50% dhe në vitin 2024 kemi arritur të ulim humbjet në shifrën historike 17,9%”.
Balluku shpjegoi se çdo të thotë të kemi 1% më pak humbje.
“Vetëm gjatë vitit 2023-2024, OSHEE Group ka menaxhuar në mënyrën më të mirë të mundshme sistemin e shpërndarjes, duke investuar për uljen e humbjeve teknike në rrjet të energjisë. 1% më pak humbje teknike në rrjet do të thotë 8 milionë euro të kursyera. Mendoni në 2013, 50% humbje teknike. Në këtë periudhë 1-vjeçare me 1% humbje më pak, pra me 8 milionë euro plus, bashkë me kursimet e tjera të ardhura nga mirëmenaxhimi i energjisë nga OSHEE Group, ia kemi dalë të ulim çmimin e energjisë me 10,5% për 1 milion e 70 mijë abonentë për vitin 2025”, deklaroi Balluku.
“E gjithë puna që bëjmë siç është dhe investimi në nënstacionin në Kuçovë sjell impakt për uljen e çmimit për qytetarët dhe rritjen e cilësisë së shërbimit dhe për t’i ofruar sektorit të turizmit që po rritet dita-ditës shërbimin energjetik që meriton”, tha ministrja.
Balluku nënvizoi se, “falë performancës shumë të mirë ia dolëm të ulim çmimin e energjisë për të gjitha familjet shqiptare. Ndaj do të vijojmë të investojmë, për të ulur humbjet dhe rritur cilësinë e shërbimit”.
/a.f/r.e/