Irani sot në zgjedhjet presidenciale

Iranianët pritën sot në radhë për të votuar në zgjedhjet presidenciale, të cilat duket se përbëjn një garë të fortë mes presidentit të tanishëm Mahmud Ahmadinexhad dhe kandidatit reformist, ish kryeministrit Mir Hosein Musavi.

Kryetari i Komisionit Elektoral, Kamran Daneshjou, tha se pjesëmarrja ishte "e pashembullt", madje ai shtoi se qendrat e votimit do të qëndrojnë hapur edhe dy orë shtesë deri në orën e 8 të mbrëmjes sipas orës lokale. Një pjesëmarrje rekord pritej mes 46 million iranianëve me të drejtë vote.

Udhëheqësi suprem i Iranit Ajatollah Ali Khamenei e hodhi votën e tij në mëngjes dhe u bëri thirrje njerëzve të merrnin pjesë në zgjedhje.  Ai u kërkoi iranianëve të ruajnë qetësinë dhe të mos lejojnë asnjë përpjekje për të krijuar tensione gjatë votimit.

Edhe Presidenti Ahmadinejad votoi sot, duke premtuar një të ardhme të ndritur dhe progresive për Iranin.

Edhe kleriku reformist Mehdi Karroubi dhe ish komandanti konservator i Gardës Revolucionare, Mohsen Rezaei marrin pjesë në zgjedhje, në të cilat ekonomia, programi bërthamor dhe marrëdhëniet me botën thuhet se luajnë një rol të rëndësishëm.

Gjatë disa ditëve të kaluara, fushata arriti kulmin dhe u shoqërua me tubime të mëdha publike nga të dy kampet kundërshtare. Dhjetra mijë njerëz mbushën rrugët e Teheranit gjatë mitingjeve.

Fushata u karakterizua edhe nga akuza të shumta dhe madje fyerje mes katër kandidatëve, gjatë të cilave u bënë aluzione për mashtrime dhe korrupsion.

Fushata u mbyll të mërkurën, 24 orë para hapjes së kutive të votimit. Nëse asnjë kandidat nuk fiton garën e sotme, dy rivalët kryesorë do të ndeshen në balotazh më 19 qershor.     (ze)