Ish-portieri i Arsenalit, Alex Manninger, humb jetën në aksident tragjik në Austri
SALZBURG, 16 prill /ATSH/ – Ish-portieri i Arsenal-it, Alex Manninger, ka ndërruar jetë në moshën 48-vjeçare pas një aksidenti tragjik në Salzburg, Austri.
Sipas autoriteteve, aksidenti ndodhi rreth orës 08:20 në një kalim hekurudhor, ku makina e tij u përplas me një tren. Shërbimet e emergjencës ndërhynë menjëherë dhe e gjetën 48-vjeçarin duke marrë ndihmë mjekësore, por ai nuk mundi t’u mbijetojë plagëve.
Lajmi për vdekjen e tij u konfirmua nga klubi i tij i parë, Red Bull Salzburg, i cili shprehu dhimbjen për humbjen dhe ngushëllime për familjen.
Manninger ishte pjesë e Arsenalit në vitet 1997–2002 dhe kontribuoi në sezonin historik 1997–1998, kur skuadra londineze fitoi dyfishin, duke triumfuar në Premier League dhe FA Cup.
Në një reagim zyrtar, Arsenali u shpreh se ishte “i tronditur dhe thellësisht i pikëlluar” nga ndarja nga jeta e ish-portierit, duke i dërguar ngushëllime familjes dhe të afërmve të tij.
Gjatë karrierës së tij, Manninger luajti për 14 skuadra në Europë, përfshirë Juventus, Siena dhe Augsburg. Ai pati gjithashtu një periudhë të shkurtër me Liverpool në vitin 2016, pa arritur të aktivizohej në ndeshje zyrtare.
Reagime dhe homazhe kanë ardhur nga klubet ku ai ka luajtur, si dhe nga Federata Austriake e Futbollit, të cilët vlerësuan kontributin dhe profesionalizmin e tij në futbollin ndërkombëtar.
Në një deklaratë, drejtori sportiv i Federata Austriake e Futbollit, Peter Schöttel, e cilësoi Manninger si “një ambasador të jashtëzakonshëm të futbollit austriak, brenda dhe jashtë fushës”, duke theksuar se karriera e tij ndërkombëtare “vendosi standarde dhe frymëzoi shumë portierë të rinj”.
Hetimet për rrethanat e aksidentit vijojnë, ndërsa homazhet nga bota e futbollit vazhdojnë për ish-portierin austriak.