Itali, “lufta” Berluskoni-Fini, kryeministri pranë krizës qeveritare
Xhanfranko Fini, kryetar i Parlamentit italian, i ka bërë thirrje ish-aleatit të tij, kryeministrit Silvio Berluskoni që të japë dorëheqjen. Në këtë mënyrë, e ardhmja politike e Silvio Berluskonit duket se është në rrezik. Ndërkohë kryeministri italian shprehet: “Më mirë të mos i lexoni më gazetat. Stilin e jetës sime nuk kam për ta ndryshuar kurrë”. Ky ishte reagimi sfidues i Berluskonit ndaj kritikës për aferën e tij të fundit me një prostitutë. Në televizion rrallë dëgjohen tone kritike ndaj Berluskonit, sepse stacionet private i përkasin atij dhe televizionin publik ai e dominon politikisht si punëdhënësi më i lartë. Deri tani, 74-vjeçari, sipërmarrës i mediave dhe prej një kohe të gjatë kryeministër ka qenë i sigurt se votuesit e tij besnikë mbajnë anën e tij, sidomos gratë shtëpiake dhe burrat me nivel të ulët arsimor. Por, kryetarin e parlamentit, Xhanfranko Finin, nuk e shqetëson aq shumë jeta private e Berluskonit, sesa politikat e ndjekura prej tij. Aleati i dikurshëm i Berluskonit është prishur që në verë me idhullin e tij dhe është larguar nga grupi parlamentar i qeverisë në parlament. Me lëvizjen e tij Fini, ai përpiqet tani, të rrëzojë Berluskonin. Në një tubim të lëvizjes së tij Fini kërkoi para 10 000 përkrahësve dorëheqjen e kryeministrit, në qoftë se ky nuk ndërron politikat ekonomike. Ekonomia italiane nuk lëviz nga vendi dhe borxhet e shtetit shtohen. Prej vitesh Berluskoni bën shumë premtime, por zbaton shumë pak në politikë praktike, pohon Fini. Gazeta ditore torineze “La Stampa” përmbledh në titull atmosferën në Itali: "Kriza qeveritare është hapur!" do të ketë edhe një luftë të fundit të fortë në mes rivalëve konservatorë Berluskoni dhe Fini, shkruante gazeta milaneze “Corriere della Sera”.
10 Nentor 2010