Janukovic synon të sigurojë Perëndimin

Presidenti i ri i Ukrainës, Viktor Janukovic, hodhi poshtë vlerësimet se ai është një lodër e Kremlinit, në intervistën dhënë gazetës britanike, The Daily Telegraph.

Ai theksoi se Perëndimi do të përfitojë nga funksioni i tij i ri, e madje edhe premtoi që t’i jap fund kërcënimit të rrjedhës së gazit rus nëpër territorin e vendit të tij për në Europë.

“Kam nxjerrë leksione nga gabimet që kam bërë në të kaluarën. E vërteta është se unë jam në anën e Ukrainës. Dëshiroj marrëdhënie të baraspeshuara dhe pragmatike me partnerët tonë strategjik”, tha Janukovic.

Yanukovic në zgjedhjet presidenciale mposhti me rezultat të ngushtë kryeministren aktuale të Ukrainës, Yulia Tymoshenkon. Tymoshenko ripërsëriti akuzat e saj se Yanukovic ka fituar, me ndihmën e manipulimit të votave.

Megjithatë, bashkësia ndërkombëtare tashmë e ka pranuar si të ligjshme fitoren e Janukovicit, ndërsa Komisioni Qendror Zgjedhor i Ukrainës ka theksuar se nuk do ta shqyrtojë ankesën e Tymoshenkos.

Pritet që Janukovicit do ta detyrojë Tymoshenkon që të jep dorëheqje nga funksioni i kryeministres, në kuadër të përpjekjeve të tij për të konsoliduar pushtetin.

Janukovic theksoi se Europa tani mund të fle e qetë, ngase Ukraina nën kryesimin e tij nuk do të përfshihet në grindje për gaz me Rusinë, grindje këto të cilat kanë karakterizuar marrëdhëniet mes këtyre dy vendeve gjatë viteve të kaluara.