Jemeni nuk pranon forca të huaja

Jemeni ka nevojë për përkrahje logjistike në luftën kundër Al Qaidës, por ky vend nuk do të lejojë operacionet e fshehta të shërbimeve të huaja kundër këtij rrjeti terrorist në territorin e vet, ka deklaruar sot Ministri i Jashtëm i Jemenit, Abubakër Al Qirbi.

Qeveria në Sanaa këtë muaj i ka shpallur luftë Al Qaidës, duke intensifikuar sulmet ajrore dhe operacionet e sigurisë, pasi që dega e Al Qaidës në Jemen mori përsipër përgjegjësinë për sulmin e dështuar kundër një aeroplani amerikan në Detroit, më 25 dhjetor të vitit të kaluar.

Megjithatë, Al Qirbi përjashtoi mundësinë e hapjes të ndonjë baze të ushtrisë amerikane në territorin e Jemenit apo operacionet e fshehta të forcave të huaja në territorin e këtij vendi.

“Ne do të ndërmarrim vetë këto operacione. Nuk kemi nevojë për ushtarë të huaj, për luftën që mund ta bëjmë vetë”, tha Al Qirbi.

Ai theksoi se qeveria e Jemenit ka bërë gabim, kur lejoi intervenimin e jashtëm në vitin 2002, kur një raketë amerikane vrau një udhëheqës të Al Qaidës, të dyshuar për sulmin vetëvrasës me bombë kundër anijes US Cole, në vitin 2000.

“Ky u dëshmua si një gabim i tmerrshëm, të cilin nuk dëshirojmë ta përsërisim. Këto aksione duhet t’i udhëheqim vetë dhe të gjithë ata, të cilët janë të interesuar, duhet të na përkrahin”, tha Al Qirbi.