KE: Siguria rrugore në nivele të ulëta

 

Siguria rrugore në vend lë shumë për të dëshiruar. Një fakt i tillë është vënë në dukje edhe nga vetë ndërkombëtarët. Zyrtarë të Komisionit Evropian deklaruan se siguria rrugore në Shqipëri është në nivelet më të ulëta në Evropë, duke e quajtur këtë situatë tragjike për qytetarët. “Siguria rrugore nuk është një nga ato fusha, ku Shqipëria renditet më mirë në Evropë. Mendoj se në këtë aspekt Shqipëria është në vendet e para për nga fundi. Dhe kjo është një tragjedi për publikun shqiptar”, u shpreh, Jonathan Shceele, drejtor në Drejtorinë e Transportit. Aktualisht Komisioni Evropian po negocion me 7 vendet e Ballkanit Perëndimor për një projekt për krijimin e traktatit të përbashkët rajonal për transportin. Sipas Drejtorit Shceele traktati ka për qëllim krijimin e një rrjeti të integruar të infrastrukturës në rajon, kusht kyç ky për hapjen dhe integrimin ekonomik të Ballkanit. “Në vitin 2003 ne ndërmorëm një studim për infrastrukturën rrugore në Ballkan dhe patëm llogaritur se për të ndërtuar një rrjet kryesor rrugësh, për rajonin nevojiteshin rreth 10 miliardë euro. Që atëherë kanë ndryshuar shumë gjëra. Shumë investime janë kryer sakaq, por edhe kostot janë rritur shumë. Nuk mund të them sot një shifër të saktë, por mund të them se ka shumë punë për të bërë dhe do të bëhet hap pas hapi. Kjo për arsye se nuk mund të gjenden kaq shumë para për një kohë kaq të shkurtër, por edhe sepse është shumë e vështirtë të implementosh një program kaq të madh në një kohë të shkurtër”, u shpreh Scheele.