KE, pritet raport kritik për Maqedoninë

Komisioni Evropian do të publikojë më 12 tetor raportet vjetore të progresit për vendet e Ballkanit Perëndimor.

Raporti i progresit për Maqedoninë për vitin 2011 pritet të jetë me disa pika kritike për mungesën e reformave në drejtësi, administratë publike, luftën kundër korrupsionit dhe gjendjen e mediave.

Me gjithë vlerësimeve negative dhe ato pozitive, KE sërish do të mbajë të hapur rekomandimin për hapjen e negociatave për anëtarësim.

Zgjidhja për çështjen e kontestit të emrit mbetet thelbësore për zhbllokimin e procesit të anëtarësimit në BE.

Por, raporti pritet të përmbajë paralajmërime për Maqedoninë për të shmangur veprimet dhe deklaratat që mund të ndikojnë negativisht në marrëdhëniet e mira fqinjësore.

Në qendër të vëmendjes do të jenë liria e shprehjes dhe mediave,  ku pritet të jepen vlerësime negative lidhur me mbylljen e mediave të pavarura dhe politizimin e skajshëm të tyre.