KESH-i shkrumbon banesën, dëmi 1.5 milionë lekë

MALËSI E MADHE – Shkëndija elektrike është bërë shkas për një tjetër djegie banese. Flakët e një zjarri shkrumbuan në orët e vona të ditës së martë një shtëpi në rrethin e Malësisë së Madhe, ndërkohë që për fat nuk u regjistruan të lënduar në radhët e njerëzve. Ngjarja ndodhi në fshatin Vrith të komunës Shkrel të Malësisë së Madhe, ku një zjarr i papritur dogji plotësisht banesën e shtetasit Tonin Vecaj. Nga të dhënat e para mendohet se dëmi i shkaktuar arrin në vlerën e rreth 1.5 milionë lekëve. Grupi hetimor po punon për zbardhjen e këtij zjarri, ndërsa nuk përjashtohet mundësia se shkak ka qenë një shkëndijë në rrjetin elektrik. Thuajse në çdo periudhë shënohen rastet e djegies së banesave për shkak të luhatjeve të tensionit, por deri më tani Korporata Energjetike Shqiptare nuk ka dëmshpërblyer asnjë person, megjithëse ka rezultuar fajtore.

14 Shkurt 2008