KKRT, masa ndëshkuese ndaj piraterisë televizive

Këshilli Kombëtar i Radios dhe Televizionit është i vendosur të forcojë më tej luftën kundër piraterisë në tregun e medias elektronike. KKRT kërkon mirëkuptimin dhe bashkëpunimin e të gjithë operatorëve rtv, në minimizimin e piraterisë në transmetimet radiotelevizive. Mbështetur në ligjin nr. 8410, datë 30.09.1998 “Për radion dhe televizionin publik e privat në Republikën e Shqipërisë” i ndryshuar, Këshilli Kombëtar i Radios dhe Televizionit ka vazhduar luftën kundër piraterisë në transmetimet radiotelevizive. Përmes një njoftimi për shtyp, KKRT bëri dje të ditur se gjatë javës së kaluar (12-19 tetor 2009), Këshilli Kombëtar i Radios dhe Televizionit ka organizuar inspektime në disa prej subjekteve televizive kabllore dhe analoge, me shtrirje në të gjithë territorin e vendit, duke synuar monitorimin e respektimit të të drejtave të transmetimit. Nga inspektimet e kryera, u vërejtën disa shkelje nga operatorë të ndryshëm televizivë, ndaj të cilëve, në përputhje me legjislacionin ne fuqi, u vendosën 5 sanksione me gjobë, ndaj operatorëve kabllorë në rrethet Vlorë, Lezhë, Elbasan. Gjithashtu, ndaj operatorëve të tjerë kabllorë dhe analogë të inspektuar, janë vendosur 10 sanksione me paralajmërim.