KOMENT – Udhëheqësit arabë dhe islamikë dënojnë sulmin izraelit në Doha

DOHA, 15 shtator /ATSH-DPA/- Udhëheqësit e shteteve arabe dhe islamike u mblodhën sot në një samit emergjent në Katar – gjatë të cilit dënuan sulmin ajror të Izraelit ndaj udhëheqësve të Hamasit, në Doha.

Avionët luftarakë izraelitë sulmuan të martën një zonë banimi në kryeqytetin e Katarit, duke synuar udhëheqësit e Hamasit.

Sulmi vrau gjashtë persona, përfshirë një oficer sigurie të Katarit, dhe plagosi 18 të tjerë, por grupi islamist palestinez tha se udhëheqja e tij e lartë mbijetoi.

Sulmi, i cili ndodhi mes negociatave të vazhdueshme për një armëpushim dhe marrëveshje për lirimin e pengjeve midis Izraelit dhe Hamasit, tërhoqi kritika globale dhe nxiti samitin emergjent.

Katari e sheh sulmin si ‘agresion të pabesë’

Emiri i Katarit, Tamim bin Hamad Al Thani e përshkroi sulmin si “një agresion të pabesë në zonën e banimit që përfshin shkolla dhe ndërtesa diplomatike.

Tamim tha se sulmi kishte ndodhur ndërsa udhëheqësit e Hamasit në Doha po shqyrtonin propozimin e SHBA-së të ndërmjetësuar nga Katari dhe Egjipti. Ai akuzoi Izraelin se po shfrytëzonte luftën në Gazë për qëllime më të gjera.

“Izraeli është një shtet që punon në mënyrë sistematike për të vrarë udhëheqësit me të cilët po negocion, ndërsa sulmon vendin ndërmjetës ku zhvillohen bisedimet”, tha ai.

“Lufta izraelite është shndërruar në një luftë shfarosjeje që synon ta bëjë Gazën të pabanueshme si një prelud për zhvendosje”, shtoi ai.

Tamim paralajmëroi se Izraeli po kërkonte gjithashtu të destabilizonte Sirinë dhe Libanin.

Udhëheqësit dënojnë sulmin në Doha

Udhëheqës të tjerë nga Organizata e Bashkëpunimit Islamik (OIC) me 57 anëtarë dhe Lidhja Arabe me 22 anëtarë iu bashkuan Katarit në dënimin e sulmit.

Mbreti Abdullah II i Jordanisë bëri thirrje për një përgjigje “të qartë dhe vendimtare”, duke thënë se agresioni kundër Katarit vërtetonte se kërcënimi izraelit nuk kishte kufij.

“Ajo që po bën qeveria juaj në emrin tuaj nuk do të harrohet, krimet nuk do të harrohen, vrasja e 63,000 njerëzve dhe vuajtja nga uria dhe zhvendosja e popullit palestinez në Gaza nuk do të harrohet. Dhe ky agresion ndaj një shteti që ka kërkuar të arrijë një marrëveshje për t’i dhënë fund luftës… nuk do të harrohet”, tha kreu i Lidhjes Arabe, Ahmed Aboul Gheit, iu drejtua popullit izraelit.

Ai tha se samiti duhet t’i dërgojë një mesazh unionit ndërkombëtar pasi ka pasur heshtje për një kohë të gjatë mbi sjelljen e  Izraelit.

“Heshtja për krimet dhe barbarizmin në Gaza për dy vjet të plota i ka bërë udhëheqësit e Izraelit të besojnë se çdo veprim është i mundur dhe se ata mund t’u shpëtojnë të gjitha krimeve”, tha kreu i Lidhjes Arabe.

Presidenti egjiptian, Abdel-Fattah al-Sissi i bëri thirrje unionit ndërkombëtar të marrë përgjegjësitë morale dhe ligjore për të siguruar që këto sulme të mos përsëriten dhe për t’i dhënë fund luftës brutale izraelite dhe gjendjes mbizotëruese të pandëshkueshmërisë për praktikat izraelite.

Sipas një projektrezolute të publikuar nga media arabe, komunikata përfundimtare pritet të dënojë agresionin “brutal” izraelit kundër Katarit dhe të dënojë krimet e gjenocidit, spastrimit etnik, urisë, bllokadës dhe aktivitetit ekspansionist të vendbanimeve të Izraelit.

Ajo gjithashtu paralajmëron se veprimet e Izraelit kërcënojnë stabilitetin rajonal dhe rrezikojnë përpjekjet drejt normalizimit. //a.i/