KQZ: Edhe firmat shqiptare në tender

Komisioni Qendror i Zgjedhjeve reagoi dje pas letrës së Partisë Socialiste dërguar këtij institucioni, ku kërkohej që prodhimi i fletëve të votimit të bëhet jashtë shtetit. Zëdhënësi Leonard Olli tha se KQZ po ndjek procedurat e tenderit të hapur e si e tillë në të mund të marrin pjesë shumë kompani. "KQZ ndjek zhvillimin e tenderit të hapur dhe në të mund të marrin pjesë shumë kompani", u shpreh zëdhënësi i KQZ-së. Në fillim të punës së KQZ-së u miratua modeli i fletës së votimit, duke iu referuar neneve 97 dhe 98 të Kodit Zgjedhor dhe ka përcaktuar disa specifikime teknike në lidhjen me llojin e letrës, dimensionet e fletës së votimit, llojin dhe trashësinë e germave, numrin serial të fletës dhe elementet që do të figurojnë në fletën e votimit. Mbetet vetëm që KQZ të ketë listën e plotë të partive që do jenë në garë, koalicioneve, kandidatëve të partive dhe atyre të pavarur që të nisë prodhimi, menjëherë pasi të shpallet firma fituese.