KQZ përcakton nesër ekspertët për auditimin e fondeve

Komisioni Qendror i Zgjedhjeve do të caktojë nesër ekspertët kontabël të licencuar për auditimin e fondeve të përfituara dhe të shpenzuara nga subjektet zgjedhore gjatë fushatës elektorale për zgjedhjet e 28 qershorit. Kodi Zgjedhor përcakton në nenin 91 se, jo më vonë  se 45 ditë nga shpallja e rezultatit për çdo subjekt,  KQZ emëron me short një apo më shumë ekspertë kontabël të licencuar për të kryer auditimin e fondeve të përfituara dhe të shpenzuara në fushatë.  Grupi i ekspertëve pas auditivit i paraqet KQZ-së një raport dhe më pas komisioni zgjedhor mund të bëjë verifikimin e të dhënave të raportit, që mund të përshijë edhe pyetjen e personave dhe subjekteve të ndryshme, këqyrjen e dokumenteve që lidhen me këtë çështje, pranë zyrave përkatëse të subjektit zgjedhor që ka paraqitur raportin, si dhe marrjen e çdo informacioni nga bankat apo persona të tretë, të cilët mund të tregojnë mbi të dhënat e paraqitura në raport.