KQZ vendos më 29 dhjetor për djegien ose jo të fletëve të votimit

Dilemat për asgjesimin ose jo të fletëve të votimit të zgjedhjeve të shkuara do të marrin fund në datën 29 dhjetor kur dhe është thirrur mbledhja e Komisionit Qendror të Zgjedhjeve. Në këtë mbledhje sipas anëtarit të këtij institucioni Klement Zguri do të merret dhe vendimi i shtyrë që prej muajit shtator kur dhe KQZ i la kohë politikës për të arritur një konsensus për çështjen e kutive ku janë depozituar fletët e votimit të 28 qershorit 2009. Zguri bën komentin e tij dhe për kërkesën që Partia Socialiste ka formuluar në ofertën e saj më të fundit ku kërkohet që materialet zgjedhore që do të vihen në dispozicion të komisionit parlamentar për hetim të merren nga KQZ dhe jo nga arkivi i shtetit siç e parashikon neni 178 pika 6 i kodit zgjedhor. 2 forcat politike ende nuk kanë gjetur gjuhën e konsensusit në lidhje me materialet që do të hetohen dhe procedurat që do të ndiqen, dihet vetëm që Partia Socialiste prej me tepër se 1 muaj ka hequr dorë publikisht nga kërkesa për hetim të fletëve të votimit. Mësohet se përfaqësuesit e opozitës dhe mazhorancës janë në proces negociatash për të arritur një marrëveshje për ngritjen e komisionit hetimor parlamentar me kushtet që do të lenë të kënaqura të dyja palët. Nëse konsensusi do të arrihet në seancën plenare të ditës së hënë do të miratohet ngritja e këtij komisioni.