Kahn kritikon Gjermaninë

Ish portieri i Gjermanisë, Oliver Kahn ka kritikuar ekipin kombëtar pas eliminimit të tyre në gjysmëfinalen e Euro 2012. Die Mannschaft pësoi disfatë 2-1 nga Italia pasi kishte bërë disa ndryshime taktike, të cilat kanë zgjuar kritika të ashpra. Dhe, ish anëtari i Bayern Munichut beson se skuadra e Joachim Lowit u tregua naive dhe është dashur të luante më mirë kundër Azzurrëve.

“Isha i befasuar nga humbja kundër Italisë”, deklaroi Kahn për Welt.

“Sidomos nga aspekti taktik. Nuk e di pse u përqendruam aq shumë te kundërshtari. Dhe e dyta, qëndrimi i futbollistëve. Kur ishim në disavantazh 1-0, pastaj 2-0, nuk më dukej se ekipi kishte një plan B. Futbollistët nuk dukeshin se janë në gjendje të rikthehen në lojë. Po ashtu nuk guxoni të bëni gabime individuale në një nivel kaq të lartë. Kërkohet përqendrim maksimal”, shtoi ai.

Gabimet në mbrojtje nga Mats Hummels dhe Holger Badstuber u shfrytëzuan nga sulmuesi italian Mario Balotelli, i cili shënoi të dy golat për Italinë. Në minutën e 92-të, Gjermania ngushtoi rezultatin në 2-1 pas shënimit të Mesut Ozilit nga penalltia. Por, ishte vonë për një rikthim te gjermanëve.