Kamxhik dhe burg për aktoren

90 goditje me kamxhik dhe një vit burg është dënimi që iu shqiptua aktores iraniane, Marzieh Vafamehr, për shkak të interpretimit të rolit kryesor në filmin “My Teheran For Sale”, i cili përshkruan vështirësitë e artistëve në republikën islamike.

Lajmi për dënimin e aktores fillimisht u përhap përmes një web-faqeje opozitare të Iranit.

“Marzieh Vafamehr u dënua me një vit burg dhe me 90 goditje kamxhiku”, theksohet në lajmin e publikuar në kalame.com. Sipas web-faqes, avokati i aktores iraniane ka ushtruar ankesë ndaj vendimit të shqiptuar të shtunën e kaluar.

Ndryshe, Marzieh Vafamehr është bashkëshortja e regjisorit dhe skenaristit iranian, Nasser Taghvai, i cili u arrestua në muajin korrik, menjëherë pas shfaqjes së gruas së tij në filmin “My Tehran For Sale”, i cili u kritikua ashpër nga qarqet konservatore në Iran.

Filmi, që është një bashkëpunim iraniano-australian, rrëfen për historinë e një aktoreje të re që jeton në Teheran, të cilës autoritetet e shtetit ia ndalojnë punën në teatër. Si rrjedhojë, aktorja detyrohet të bëjë një jetë të fshehtë, në mënyrë që të arrijë të shprehë vetveten artistikisht.