Kamzë, kërcënohet nënkryetari i KZAZ-së

Komisioni i Qendrës së Votimit 1595, i lagjes nr. 4, në Bathore, ka përzënë nënkryetarin e KZAZ-së së Kamzës, Altin Xhixha, në kohën që ai ka hyrë për të parë sesi po shkonte procesi i votimit. Një rast i rrallë ky që tregon sesa e tensionuar është dita e zgjedhjeve në këtë zonë, kur një komision i një qendre votimi përzë eprorin e vet, siç është rasti i nënkryetarit të KZAZ-së. Menjëherë pas këtij incidenti të rëndë, në vendngjarje kanë mbërritur vëzhgues të OSBE-ODIHR-it, si dhe forcat e policisë, të thirrura nga nënkryetari i KZAZ-së. Por, kryetari i komisionit të kësaj qendre votimi e shpjegon ndryshe incidentin. "Na ofendoi pasi thirri të mbyllet qendra e votimit", tha ai për nënkryetarin e përzënë. Kjo deklaratë mohohet nga Xhixha, i cili pohon se sapo ka hyrë në objekt, i pajisur me mjetin e identifikimit, ai jo vetëm që është nxjerrë jashtë, por edhe është kërcënuar. Kërcënimi i dytë ndaj tij ky, pas atij të ditës së shtunë. Ai u kërcënua dy ditë më parë nga një punonjës i policisë së burgjeve, ende i paidentifikuar. Ndërkohë, edhe prania e kamerave të "Top Channel" nuk është pritur edhe aq mirë nga komisioni dhe njerëzit në afërsi të qendrave të votimit. Për anomali në proces flet edhe kandidati socialist, Sul Cara, i cili akuzon kryetarin e Bashkisë së Kamzës se po përdor administratën për të bërë presion tek votuesit. "Ky presion po bëhet nga punonjësit e bashkisë. Për këto katër qendra do të komunikojmë me përfaqësuesit e KZAZ-së dhe mund të tërheqim edhe komisionerët tanë", u shpreh dje Cara. Përveç ambienteve publike të kthyera në qendra publike, në Kamëz, Paskuqan, Bathore e Babrru, 22 prej tyre janë private. Ajo që të bie në sy është se disa nga objektet private ku po votohet janë bilardo, dyqane ushqimore, lokale apo edhe ofiçina makinash.