Kapshticë, bllokohen 2.7 kg kokainë e 300 gr heroinë
KORÇË Bllokohen plot 3 kile lëndë narkotike në pikën kufitare të Kapshticës, në Korçë, ku 2.7 kg dyshohet të jetë e llojit kokainë dhe 300 gramë e llojit heroinë. Pas sekuestrimit të sasisë së drogës në autobusin e linjës "Altrans" Tiranë-Selanik, u arrestuan në flagrancë: Artiol Sula, nga Korça, emigrant në Greqi; Asqeri Bebri (40 vjeç), banues në qytetin juglindor, si dhe Neada Kota (19 vjeç), po nga Korça dhe studente e vitit të parë në Universitetin "Aristoteli" në Selanik të Greqisë. Pas informacioneve të sakta të siguruara në rrugë operative, se një sasi e madhe droge do të transportohej për në Greqi, Sektori i Antidrogës në Drejtorinë e Policisë së Qarkut të Korçës ndërmori operacionin e koduar "Debatiku", i cili startoi me vënien në pranga të tre autorëve të krimit. 23-vjeçari Sula, Bebri dhe Kota akuzohen për "trafikim ndërkombëtar të lëndëve narkotike, kryer në bashkëpunim". Burime zyrtare nga Policia e Korçës, bëjnë me dije se rreth orës 15:00 të ditës së djeshme u ushtrua kontroll në autobusin e linjës Tiranë-Selanik. Mësohet se gjatë kontrollit të imtësishëm, iu gjet si dhe iu sekuestrua në cilësinë e provës materiale, 2.7 kg kokainë Artiol Sulës (aktualisht emigrant në Greqi dhe i padënuar më parë). Sipas hetuesve të çështjes, 23-vjeçari e kishte fshehur drogën në trup. Lënda narkotike ishte e paketuar në tri pako dhe e mbështjellë me letër natriban. Gjithashtu, gjatë kontrollit i është gjetur 700 gramë heroinë e paketuar në qese plastmase Neada Kotas. Dy të rinjtë, të cilët prej disa vitesh jetonin si emigrantë të ligjshëm në vendin fqinj, ishin ulur në vende të ndryshme, në autobusin e linjës "Altrans", Tiranë-Selanik. Gjatë marrjes në pyetje, ata kanë deklaruar se nuk njiheshin njëri me tjetrin. Por, burime nga organi hetimor pohojnë se Sula dhe Kota janë pjesë e rrjetit më të fundit të drogës me Greqinë. Vetëm pak kohë pas prangosjes së dy emigrantëve është arrestuar dhe bashkëpunëtori i tyre, Asqeri Bebri. Ky i fundit ishte dënuar më parë po për trafik droge. Burimet e mësipërme sqarojnë se 40-vjeçarit iu sekuestrua një sasi vlere monetare si dhe automjeti tip "Benz" me targë KO 4654B, në pronësi të tij. Ndërkaq, policia dhe prokuroria e Korçës po hetojnë për identifikimin dhe vënien në pranga dhe të personave të tjerë që dyshohet të jenë përfshirë në rrjetin e trafikut të lëndëve narkotike me destinacion Selanikun. Materialet i janë përcjellë Prokurorisë së Krimeve të Rënda në Tiranë për hetime të mëtejshme.
(s.g/GazetaShqiptare/BalkanWeb)