Kartat, për një javë 36 mijë kuponë

 

Një jave pas nisjes së procesit të pajisjes me karta identiteti, në Tiranë janë shitur rreth 36 mijë kuponë. Të dhënat vijnë nga Drejtoria e Postës Shqiptare. Edhe në fundjavë ka pasur qytetarë të interesuar, numri i të cilëve ka arritur në rreth një mijë. “Gjendja është normalizuar ndërkohë që furnizimi me kuponë bëhet çdo ditë. Kjo për të bërë të mundur, që qytetarët të pajisen me letërnjoftimin e ri brenda afateve të caktuara”, u shpreh dje drejtoresha e Postes Shqiptare për Tiranën, Pranvera Lalaj. Por ndërsa fluksi është ulur disi në zyrat e postës e minibashkive ku realizohet faza e dytë e aplikimit për kartat, radhët vazhdojnë. Qytetarët presin me orë të tëra, për të përfunduar në kohë procedurën në kohë, duke u shpëtuar kështu sanksioneve që parashikon qeveria. Në rast se shkelin afatet nëpunësit e administratës rrezikojnë tërheqjen e pagave, ndërsa pensionistët pensionet.