Kaskada e Devollit, Berisha: Tenderi, në fillim të 2012-ës

Kryeministri Berisha ka deklaruar në mbledhjen e sotme të qeverisë se tenderi ndërkombëtar për ndërtimin e Kaskadës së Devollit, që parashikon ndërtimin e tre hidrocentraleve do të hapet muajt e parë të vitit të ardhshëm. Një ditë pas kthimit nga Norvegjia, Berisha theksoi se tashmë ka përfunduar gjithçka dhe kompanitë autriake dhe norvegjeze pasi kanë zgjidhur të gjitha problemet gjatë muajve të parë të vitit që vjen hapin tenderin për fillimin e punimeve.

“Kjo është vepra më komplekse, më madhore që është krijuar në vend që bazohet në ndërtimin e dhjetra tuneleve dhe ka investimin më të madh. Në takimet e mia është rënë dakort që qeveria të nisë vitin e ardhshëm rrugën dhe qytetarët e Gramshit të kenë të gatshme rrugën e re që sjell drejt kryeqytetit para se t`ju ndodh përmbytja e rrugës së vjetër. Do të jenë 18 km rrugë dhe do të jetë rruga më panoramike e rajonit. Kam kënaqësinë t`ju informoj që kaskada e Devollit do të jetë realitiet më i madh i investimeve private në Shqipëri” ka shtuar Berisha.

Berisha ka theksuar gjithashtu se skeptikët duhet të jenë të qetë pasi shpejt kjo ëndërr do të bëhet realitet ndërsa shtoi se muajin e parë të vitit 2012 do të hapet edhe tendederi për kompanitë që do e ndërtojnë kaskadën e Devollit.

Një tjetër pikë ku kryeministri Berisha u ndal ishte edhe gazsjellësi që fillon në Kaspik dhe kalon në Turqi, Shqipëri, Itali që sipas tij është projekti më  fizibël i të gjithë sistemeve të gazsjellësve deri më sot i cili do të çojë gazin e Kaspikut drejt Europës.
 

“Është projekti i cili kushton 2 miliard euro, më lirë se të gjithë projektet e tjera që shkojnë drejt Italisë dhe mund të ndërtohet në kohë rekord për shkak të distancës më të shkurtër” ka theksuar Berisha.