'Keka', Ndoka dorëzon paditë për Topallin dhe Policinë

TIRANË- Kreu i PDK-së, Nard Ndoka ka dorëzuar sot në prokurori paditë penale ndaj Jozefina Topallit dhe Policisë së Shtetit, për të cilat kishte njoftuar që më parë, vetëm pk ditë pas vrasjes së kreut të PDK-së për Malësinë e Madhe, Aleks Keka.
Fyerje për shkak të detyrës, shpifje dhe thirrje për urrejtje nacionaliste janë objekt i padisë ndaj Topallit.
"E kallëzuara, Topalli, në një takim elektoral në fshatin Mes të Komunës Postribë, përpara qindra mijëra personave është shprehur: "Në do të këmbëngulim që të marrim aq deputet sa të qeverisim të vetëm, pa ato partitë e vogla, demokristianë, republikanë etj. Këta janë o spiunë, o mafiozë, o kontrabandistë."- thuhet në padinë ndaj Topallit.
Sipas paditësit, Topalli ka shpifur për hir të detyrës dhe ka bërë thirrje për urrejtje nacionale.
"Shtetasja e kallëzuar, me dashje, me veprime aktive, ka fyer dhe shpifur botërisht, në dëm të disa personave, për shkak të detyrës, më tepër se një herë, subjekte anëtarë të Partisë Demokristiane të Shqipërisë. Gjithashtu, thirrja për urrejtje nacionale është konsumuar në ambiente publike dhe në pjesëmarrje të qindra mijëra personave"- thuhet në padi.
Ndërkohë, sipas padisë tjetër të dorëzuar, Ndoka kërkon fillimin e procedimit penal kundër shtetasve të paidentifikuar, pjesëtarë të Policisë së Shtetit, madhorë, banues në Tiranë, për kryerjen e veprave penale të shpërdorimit të detyrës dhe veprimeve që pengojnë zbulimin e së vërtetës, të kryera në bashkëpunim.
"Pas kryerjes së krimit, ku mbeti i vrarë Aleks Keka, Kryetar i Partisë Demokristiane të Malësisë së Madhe, rreth orës 13.30, të kallëzuarit kanë nxjerrë një deklaratë zyrtare për shtyp, në të cilën ndërmjet të tjerave janë shprehur:
"Viktima Aleksandër Keka ishte person me precedentë kriminalë në trafikun e drogës dhe të eksplozivëve me telekomandë... Duhet theksuar se prej vitesh shtetasi Aleksandër Keka është evidentuar nga strukturat e policisë lokale e qendrore si person me precedentë të theksuar kriminalë, me tendencë trafikun e lëndëve narkotike, trafikun e mjeteve motorike dhe të lëndëve plasëse me telekomandë."
Gjithashtu, subjektet e përmendur, në deklaratën e parë për shtyp, kanë informuar publikun se: "shkaku i vdekjes së shtetasit Aleks Keka është shpërthimi i lëndës djegëse të mjetit (gazi) gjatë lëvizjes në rrugë."- citohet në padinë për Policinë e Shtetit.
Sipas Ndokës, shtetasit e kallëzuar, me cilësinë e punonjësve të policisë, në bashkëpunim me subjekte të tjerë, kanë kryer veprime aktive që drejtohen kundër përmbushjes së rregullt të detyrave shtetërore, të manifestuara nëpërmjet krijimit dhe paraqitjes stë informacioneve të rreme në lidhje me një ngjarje kriminale, për interesa të një grupi të caktuar njerëzish.
Madje, ata sipas paditësit kanë përhapur në publik të dhëna të rreme, të krijuara prej tyre, që nuk përputhen me personalitetin e viktimës.

*******

Tre ditë më parë Ndoka lajmëroi se do të bënte padi ndaj nënkryetarjes së PD-së, Jozefina Topalli për shpifje ndaj PDK-së. Sipas tij, nuk do të kursehej as Policia e Shtetit, që sipas Ndokës ka shpifur për kryetarin e ndjerë të PDK në Malësinë e Madhe Aleks Keka duke e quajur trafikant.

"PDK ka gati nje denoncim në prokurori për fyerjet e Topallit ndaj PDK si dhe nje padi ndaj policisë per deklaratën e saj qe ka perbaltur Kekën pas vdekjes", u shpreh Ndoka. Sipas tij, vrasja e Kekës ishte një goditje e rëndë për PDK dhe për familjen e të ndjerit.

Në një konferencë për shtyp në Shkodër, Ndoka e konsideroi vrasje politike, atentatin ndaj kryetarit të PDK-së në Malësinë e Madhe, Aleks Kekës. Kreu i PDK deklaron se pista e vetme qe duhet hetuar nga policia, është ajo e vrasjes politike. Duke shtuar se "Policia e Shtetit në vend të hetojë rastin bën deklarata joprofesionale ndaj figurës së Kekës". Ndoka shprehet i indinjuar se PDK nuk do të qëndrojë duarkryq, por do të marrë masat e para kundër padrejtësive.

Aleks Keka, kryetar i PDK-së në Malësinë e Madhe humbi jetën dje të enjten paradite pranë Shkodrës. Ngjarja e rëndë ndodhi më 18 Qershor në orën 09:45, në rrugën nacionale Shkodër-Hani i Hotit, në vendin e quajtur Grizhë. Aleksandër Keka ishte duke udhëtuar i vetëm me automjetin tip "Mitsubishi Pajero" me targë SH 2125E (në pronësi të vëllezërve Bitani), nga Kopliku për në drejtim të qytetit të Shkodrës, kur makina me të cilën udhëtonte shpërtheu fuqishëm duke i shkaktuar atij vdekjen. Pas minuta pas vdekjes së tij PDK akuzoi PD dhe kryesisht Topallin për deklarata që nxisin dhunën, që sipas tyre solli dhe vdekjen e Kekës. Në të njëjtën ditë Policia e Shtetit në njoftimin për shtyp e cilësoi Kekën si person që hetohej nga policia me precedent penale. Policia dyshonte se Keka merrej me trafiqe të paligjshme. Kjo ndezi reagimin e PDK që akuzoi Policinë se po përdoret si instrument nga PD në këto zgjedhje.

***********

Topalli: PDK mafioze? E përsëris çdo ditë

TIRANE- INTERVISTA/ Znj. Topalli, është vrarë, është hedhur në erë, kryetari i PDK-së së Malësisë së Madhe, Aleks Keka. Kjo ka ndodhur vetëm pak ditë pas deklaratës së lëshuar nga ju kundër PDK-së e PR-së. Kjo deklaratë solli zemërimin e PR-së e PDK-së. Kreu i PDK-së ju ka akuzuar konkretisht "është një akt i rëndë terrorist që e ka zanafillën te mostra Topalli që ka nisur fushatë kundër PDK-së në çdo fshat e shtëpi. Pse kjo deklaratë e ashpër?

E ashpër? Unë e përsëris çdo ditë

I keni thënë spiun dhe mafioz?

Ju e dëgjoni për herë të parë këtë fjalë nga unë. Nuk e keni dëgjuar më parë nga unë këto katër vjet në Parlament. Jo për të gjithë demokristianët, dhe nga ish-deputetë sepse ato nuk do të jenë më deputet. Bëj dallim unë midis tyre, jo të gjithë janë e njëjta gjë. E ke dëgjuar në Parlament dhe e kam thënë kur kam qenë në fushatë elektorale.

Dhe i qëndroni?

-Sigurisht që i qëndroj

Përse për çfarë arsye? Mbi ç'bazë e bëni këtë deklaratë?

-Sepse është e vërtetë

Ç'domethënë është e vërtetë, kush është spiun mafioz?

-Këto kanë thënë se kjo është gjuha e urrejtjes, unë them se kjo është gjuha e së vërtetës. Po të gjykojmë se ne nuk duhet të themi kurrë të vërtetat ky vend nuk do të ishte ku jemi sot. Nuk besoj se ka qenë gjuhë e urrejtjes kjo. Po të hyjmë në këtë mentalitet të diskutimit, i bie që katër vite më parë thoshim se është sistemi i kleptokracisë, kjo është gjuhë e urrejtjes apo e së vërtetës. Edhe një herë të them se kjo vlen për dy prej ish-deputetëve të atij grupi. E përsëris, e kam thënë në Parlament dhe e përsëris çdo ditë.

Cilët janë ato?

-Ato që ti citove. Për sa i përket pjesës tjetër, ajo që unë kam pasur në mend është për këto dy persona. Për Partinë Republikane nuk vlejnë këto. Për PR-në dhe për çdo parti tjetër për shkak të sistemit të ri, është detyra ime që votat e PD-së nuk do të shkojnë për asnjë parti tjetër, as për PR-në, e as për ndonjë parti tjetër të vogël. Ky është dallimi ndërmjet njërës dhe tjetrës.

Zëdhënësi i PD-së ka thënë se nuk është thënë në këtë kontekst fraza?

-Atë po them edhe unë, të njëjtën gjë po them, sigurisht se ka diferencë. Për ato dy demokristianët i qëndroj deklaratave.

A ka ndonjë lidhje në mes kësaj deklarate dhe vrasjes së zotit Keka?

Po e kam bërë këto katër vjet rresht në Parlament dhe ka muaj që e them në çdo fshat dhe në çdo qytet në takimet që bëj.

Pse marrëdhëniet janë kaq të tensionuara me Ndokën?

-Unë mendoj se nuk ia vlen fare që të ndalësh. Marrëdhëniet e mia nuk janë fare të tensionuar me të. Janë marrëdhënie që s'kanë asgjë të përbashkët, as në princip, as në ideale, e as në shtetin e së drejtës. Zoti Ndoka është larguar nga qeveria dhe fakti që është larguar do të thotë se ne kemi pasur arsye të shumta për të mos vazhduar bashkimin me të.

Policia ka deklaruar se personi i vrarë, viktima kishte precedente penale në trafikun armëve e drogës etj. A kanë qenë këto deklarata politike të Policisë?

-Ngjarja është tragjike dhe i shpreh ngushëllime familjes. Unë do i kërkoja prokurorisë, policisë dhe agjencive të tjera të sigurimit që të bëjnë të mundur një hetim të plotë të gjithanshëm dhe të paanshëm. Kaq.

A është problematike në fushatë, që në prag fushate vritet një deputet i PS-së dhe vritet një kandidat për deputet?

Është një ngjarje e rëndë për Xhindin. Për atë nuk e kam dëgjuar asnjëherë se është kandidat për deputet.

Marrë me shkurtime nga "Opinion"