Koha për pajtim në Maqedoni

Organizata qytetare “Civil” apelon për një pajtim politik në Maqedoni, midis forcave politike që mbajnë përgjegjësi për krizën aktuale.

Kjo organizatë që drejtohet nga Xhabir Deralla njofton për organizimin e një Konference për Kulturë politike dhe Dialog Civil e cila ka për synim pajtimin e forcave politike.

“Civil” në konferencën që pritet ka ftuar në tryezë kryeministrin Nikola Gruevski, kryetarin e BDI-së, Ali Ahmeti, kryetarin e LSDM-së, Branko Cërvenkovski, të PDSH-së Menduh Thaçi, të DR-së Imer Selmani dhe partive tjera.

“Dialog dhe të ndajnë një orë nga koha e tyre me njëri- tjetrin, si dhe me përfaqësues të publikut maqedonas dhe ndërkombëtar. Çdonjëri prej tyre është i ftuar të flasë 5-7 minuta në një temë të vetme: mundësi për tejkalimin e krizës politike dhe ndarjeve të thella të cilat e lëkundin shoqërinë tonë”, theksoi “Civil”.

Kjo nismë vjen siç thuhet pas thellimit të ndarjeve në shoqëri, vijat politike-partiake, tensionet etnike, jo-tolerancën fetare, diskriminimin e personave, grupeve dhe kategorive në shoqëri, ne, si pjesë e shoqërisë civile, bëjmë thirrje për dialog dhe fillim të pajtimit të gjerë politik në vend.