Komision për të Vërtetën dhe Pajtimin, ideja më e re e Thaçit

Kryeministri i Kosovës, i cili prej disa ditësh po qëndron për vizitë zyrtare në ShBA, duke folur për Associated Press, ka thënë se po e diskuton idenë për një Komision për të Vërtetën dhe për Pajtim për Kosovën që do të shëronte plagët e konflikteve në rajon.

Thaçi ka thënë se integrimi i serbëve brenda sistemit është mundësia e vetme për të ecur përpara në Kosovë. Sipas tij, nuk do të ketë as autonomi, as favore speciale dhe as shkëmbim territoresh.

Kryeministri i Republikës së Kosovës, Hashim Thaçi gjatë vizitës së tij në Uashington, ka vendosur kurorë lulesh në varrezën e ushtarit të panjohur, në Kompleksin e Varrezave Ushtarake në Arlington.

Gjithashtu Thaçi, po në Uashington, është takuar me ish- senatorin e njohur Bob Dole. Në takim me të Thaçi i ka shprehur respektin e madh që gëzon senatori Dole nga populli i Kosovës, si dhe nga Qeveria e Republikës së Kosovës.

Gjatë takimit me kryeministrin Thaçi, senatori Dole, theksoi se vazhdon të qëndrojë afër popullit të Republikës së Kosovës dhe krenohet me arritjet që janë bërë në Kosovë.