Komisioni për Veprimtaritë Prodhuese, Tregtinë dhe Mjedisin shqyrton projektligjin Për gjuetinë
Komisioni për Veprimtaritë Prodhuese, Tregtinë dhe Mjedisin, në mbledhjen e datës 8.2.2010, në orën 11:00, vazhdoi shqyrtimin e projektligjit "Për gjuetinë, duke organizuar një seancë dëgjimore me grupet e interesit.
Ishin të pranishëm në mbledhje përfaqësuesit e Ministrisë së Mjedisit, Pyjeve dhe Administrimit të Ujrave: Zëvendësministri Taulant Bino, Bajram Ejdiaj dhe Saimir Hoxha, përfaqësuesit e Federatës së Shoqatave të Gjuetarëve: Petrit Gjoni, Themi Peri, Kujtim Hazbiu dhe Nesti Postoli, si dhe përfaqësuesit e shoqatës së Operatorëve të Gjuetisë Turistike: Mevlan Jaupaj, Fadil Majko dhe Robert Çibuku.
Seancën e hapi Kryetari i Komisionit, Jemin Gjana, i cili i ftoi të ftuarit të prezantoheshin dhe të parashtronin mendimet e tyre rreth këtij projektligji.
Përfaqësuesit e Federatës së Shoqatave të Gjuetarëve bënë një prezantim të organizmit që përfaqësojnë dhe theksuan se kjo federatë që përmban 38 shoqata, anëtare me të drejta të plota në organizmat homologe europiane dhe botërore, është e interesuar për përgatitjen e një ligji sa më bashkëkohor për gjuetinë. Vërejtjet e saj, të paraqitura paraprakisht me shkrim në Komision, propozonin krijimin e Këshillit Kombëtar të Faunës së Egër, pranë Ministrisë së Mjedisit, Pyjeve dhe Administrimit të Ujërave, si dhe ndryshime për nenet 24, 46, 48, 56, 64 dhe 65 të projektligjit. Ata shprehën shqetësimin e tyre për krijimin e shumë shoqatave, të cilat nuk plotësojnë kushtet bashkëkohore për të qënë të tilla, krijimin e kurseve të përgatitjes së gjuetarëve, të drejtuar nga specialistë të fushës, disiplinimin e këtij aktiviteti etj. Gjithashtu, ata kërkuan të forcohen sanksionet për shkeljet.
Përfaqësuesi i Shoqatës së Agjensive të Gjuetisë Turistike e vlerësoi në përgjithësi punën e bërë për përgatitjen e këtij projektligji. Ai propozoi ndryshime për nenin 1, për Kreun e Tretë, si dhe forcimin e sanksioneve, etj.
Në përfundim, Kryetari i Komisionit ftoi përfaqësuesit e Shoqatës së Agjencive të Gjuetisë Turistike, që të paraqesin me shkrim në Komision propozimet e tyre konkrete, për nene të veçanta të projektligjit.
Shqyrtimi nen për nen i projektligjit do të vazhdojë në mbledhjet e javës së ardhshme.