Komisioni për Veprimtaritë Prodhuese, Tregtinë dhe Mjedisin vijon shqyrtimin e projektligjit Për detergjentët".

  Komisioni për Veprimtaritë Prodhuese, Tregtinë dhe Mjedisin, në mbledhjen e datës 2.12.2009, në orën 11:00, vazhdoi  shqyrtimin nen për nen  të  projektligjit Për detergjentët".   Ishin të pranishëm në mbledhje: përfaqësuesit e Ministrisë së Ekonomisë, Tregtisë dhe Energjetikës, Zamir Stefani, Elfrida  Bino dhe  Erinda Prifti.   Fillimisht   u dëgjuan shpjegimet e përfaqësuesve të ministrisë, të cilët kishin sjellë riformulim të  nenit 5 të projektligjit,  sipas vërejtjeve që bënë anëtarët e komisionit në mbledhjen e  mëparshme.
Pas diskutimeve, komisioni vazhdoi me shqyrtimin nen për nen të  projektligjit gjatë të cilit, u bënë  vërejtje dhe  ndryshime për   nenet: 8, 10, 12, 13, 14, 15 dhe 17   me qëllim saktësimin dhe përmirësimin e tij.
Pas shqyrtimit nen për nen, komisioni e votoi në tërësi projektligjin dhe e miratoi atë me ndryshimet që u bënë në komision, të cilat do të paraqiten në raportin e komisionit për seancën plenare.