Komisioni për Veprimtaritë Prodhuese, Tregtinë dhe Mjedisin zhvillon seancë dëgjimore me kreun e bordit të ERE tarifat e energjisë elektrike për vitin 2010.

Komisioni për Veprimtaritë Prodhuese, Tregtinë dhe Mjedisin, në mbledhjen e datës 17.12.2009, në orën 11:00,  dëgjoi raportimin e Kryetarit të Bordit të Entit Rregullator për Energjinë për  tarifat e  energjisë elektrike për vitin 2010.
Ishin të pranishëm në mbledhje: kryetari i Bordit të ERE-s, Bujar Nepravishta  dhe Entela Shehaj.
 
Fillimisht, u dëgjua raportimi i kryetarit të Bordit të ERE-s, Bujar Nepravishta, I cili shpjegoi strukturën  aktuale të organizimit  të sektorit elektrik në Shqipëri.
 
Në vitin 2009,  tregu i energjisë elektrike përbëhet  nga 3  shoqëri aksionere: KESH-i për pjesën e gjenerimit të energjisë elektrike, OST, për pjesën e transmetimit  të energjisë elektrike  dhe të interkoneksionit të rrjeteve të vendit me ato ndërkombëtare dhe OSSH, për shpërndarjen  nga  furnizuesit  me shumicë tek konsumatorët. Përveç këtyre aktorëve kryesorë, në treg, veprojnë edhe tregtarë të energjisë elektrike,  të  licensuar  nga ERE, që kanë për detyrë të sjellin,  të importojnë,  ose të eksportojnë energji elektrike, në përputhje me legjislacionin në fuqi,  si dhe furnizuesit e kualifikuar dhe klientët e kualifikuar, të cilët  e zgjedhin vetë furnizuesin e energjisë elektrike dhe  kanë konsum të madh të energjisë elektrike.
 
Shqipëria është një vend ku energjia elektrike prodhohet pothuajse nga energjitë e rinovueshme (kryesisht nga hidrocentralet). Kjo strukturë, e bën prodhimin e energjisë të jetë i varur nga moti. Për këtë arsye prodhimi i energjisë në Shqipëri mbetet i varur nga importi. Viti që ka patur importin më të madh të energjisë elektrike ka qënë viti 2007,  vit në të cilin kanë qenë çmimet më të larta të  energjisë elektrike.
 
Si pasojë, është krijuar një deficit, megjithëse një  pjesë e madhe e këtyre blerjeve  është përballuar nga buxheti i shtetit. 
 
Ai shpjegoi  edhe parimet e përcaktimit të çmimeve dhe tarifave që zbaton ERE. Përsa i përket  politikave tarifore,  konsumatorët duhet të jenë në pozicione të barabarta.    
 
Energjia e prodhuar në vend ka një kosto të ulët,  si rrjedhim edhe çmimi i kësaj energjie  është  i ulët. ERE ka përgatitur të gjithë kuadrin ligjor për rritjen e eficencës  së shfrytëzimit të  kaskadave të  hidrocentraleve. Nëse hidricentralet  punojnë me kapacitet maksimal,  nuk  derdhet kot asnjë  pikë ujë.
Pas viteve 90,   konsumi familjar përbën 50% të   konsumit të përgjithshëm të energjisë elektrike. Me anë të përcaktimit të tarifave, sipas një pragu 300 KWh, ERE,  bën të mundur pakësimin e përdorimit të energjisë për ngrohje. Konsumatorët  familjarë  kanë një tarifë më të ulët se konsumatorët  industrialë. Gjithashtu, është ulur  diferenca e tarifave për të stimuluar biznesin. Kosto e prodhimit  të energjisë  nga TEC-i  i Vlorës  ka ndikuar në rritjen e shpenzimeve të  gjenerimit të energjisë elektrike.  Investimet e bëra në këtë sektor  kanë ndikuar në  rritjen  e çmimit të energjisë elektrike të prodhuar në vend. Niveli i humbjeve  i konstatuar në dhjetor të vitit 2008 ka qënë 32.7%. OSSH kontraktoi një kompani ndërkombëtare për të  verifikuar nivelin  e humbjeve. Pas verifikimeve,  ata e deklaruan një nivel humbjesh prej 35.7% pra, pra 3% më i lartë për  periudhën 2009 - 2014. Mbi këtë bazë ata kërkuan një rritje të tarifave të energjisë elektrike, por ERE  insistoi që  të pranohet niveli i humbjeve prej 32.7% edhe për vitin  2009. OSSH ka për detyrë të ulë  humbjet  deri në 15.74% deri në vitin 2014. Me anë të këtyre  rezultateve ERE mundësoi  uljen  e përqindjes së  kërkuar nga ÇEZ-i.
 
Parashikohet  që deri në vitin 2012 të liberalizohet edhe tregu familjar. Për industrinë e   bukës dhe të miellit, si dhe për konsumatorët familiarë që harxhojnë  më pak se 300 KWh, çmimi  i energjisë elektrike do të jetë  i njëjtë.
 
Në bashkëpunim me Ministrinë e Punës dhe Çështjeve Sociale dhe INSTAT-in është  përcaktuar  fondi i kompensimit për shtresat në nevojë.  Në bazë të deklaratës  rregullatore ERE ka bërë marrëveshje  me ÇEZ-in që, nëse rritja e çmimit   të  energjisë për një vit të caktuar do të jetë më e lartë  se 15%, pjesa mbi këtë prag, do të lihet për vitin në vijim. Rritja e çmimit  për këtë vit do të jetë 13%.  Situata   në të ardhmen është optimiste,  sepse  do të vihen në punë burimet alternative dhe do të ulen humbjet në rrjet.
 
U vijua me pyetjet  për të ftuarit. Në përfundim të diskutimeve, kryetari i komisionit e  falenderoi  kryetarin e Bordit të ERE-s për  raportimin.