Kompania ndërtuese përfundon instalimin e pajisjeve elektromekanike

Nga dita e nesërme rinis qarkullimi i automjeteve në tunelin e Kalimashit

Ministria e Punëve Publike dhe Transportit njofton të gjithë përdoruesit e Autostradës Durrës-Morinë, se më datë 21.05.2010, galeria Jugore e tunelit të Thirrës, në segmentin Rrëshen –Kalimash, vihet nesër përfundimisht në shfrytëzim të trafikut publik.
Të gjitha punimet për strukturën mbështetëse të Galerisë Jugor të tunelit të Thirrës kanë përfunduar. Punimet elektromekanike dhe të sistemeve të kontrollit të trafikut janë instaluar dhe integruar plotësisht në një sistem të kontrollit qendror që përfshin 26 ventilator të mëdhenj ajrimi, më shumë se 70 kamera CCTV, sinjalistikën e mesazheve variabël elektronik, një sistem kundër zjarrit në të gjithë tunelin, lokalizimin në mënyrë automatike të tymit dhe gazrave dhe zbulimin e incidentit, një sistem telefonik në rast emergjence, komunikimin me radio, si dhe ndriçimin normal dhe atë të sigurisë.
Tuneli i Thirrës u mbyll me qëllim që t’i mundësohej kompanisë ndërtuese të përfundonte instalimin e këtyre pajisjeve elektromekanike si dhe për të sistemuar presionin e krijuar nga një shtresë gjeologjike jo e qëndrueshme në një segment të vogël të tunelit.
Duke filluar nga ora 10:00 e ditës së nesërme, tuneli i Thirrës do të jetë i hapur për trafikun, duke bërë të mundur kështu tranzitimin në të gjithë segmentin Rrëshen-Kalimash.