Kompanitë e sigurimeve paguajnë dëme vetëm 14% të primeve

Sasia e dëmeve që paguajnë kompanitë e sigurimeve në Shqipëri është më e ulëta në rajon dhe një prej më të ulëtave në botë. Të dhëna zyrtare bëjnë të ditur se raporti mes dëmeve dhe primeve (vlerës së plotë që është paguar si tarifë sigurimi) është rreth një të nëntat. Konkretisht totali i dëmeve të paguara bruto nga shoqëritë e sigurimeve në periudhën janar - korrik të vitit 2008 kapi vlerën 732.455 mijë lekë, ose 14.13% më pak se në janar - korrik të vitit 2007. Pjesa më e madhe e dëmeve të paguara bruto u përket sigurimeve motorike me 601.655 mijë lekë apo 84.70% të totalit.

Të dhëna të Autoritetit të Mbikëqyrjes Financiare theksojnë se kjo ulje në dëmet e paguara bruto ndihet në portofolin "Kartoni Jeshil", me rreth 46.07 %, ndërsa me ulje prej 36.19 % rezulton edhe numri i dëmeve të paguara, krahasuar me 7 mujorin e parë të vitit 2007. Rritja në vëllimin e primeve nuk u shoqërua me ritëm të ngjashëm në pagesat e dëmeve nga shoqëritë e sigurimit, duke shtuar se ky tregues është larg sjelljes së tregjeve të rajonit e Evropës. Është e qartë se kompanitë e sigurimeve në Shqipëri e kanë shumë të vështirë të paguajnë dhe për këtë ato përdorin dhjetëra mekanizma burokratikë, megjithatë një kompani ndër shumë mes tyre paguan ndryshe. Kompania INSIG megjithëse ka vetëm 9 për qind të tregut të sigurimeve, paguan më shumë se sa 13 për qind të gjithë dëmeve që paguhet në vend nga tërë kompanitë. Sipas të dhënave të AMF-së, duke qenë se raporti dëme/prime në nivel tregu, vazhdon të mbetet në nivele shumë të ulëta, rreth 25%, janë ndërmarrë disa masa që kanë të bëjnë kryesisht me trajtimin e dëmeve, bazuar në standardet e OECD, licencimin e vlerësuesve të pavarur të dëmeve në sigurime. Ata shprehen se vëmendje e veçantë po i kushtohet trajtimit të ankesave të ndryshme, krahas detyrimit të vendosur të shoqërive të sigurimit për mbajtjen e një baze të dhënash për ankesat e konsumatorëve, e cila do të jetë në monitorim të vazhdueshëm nga Autoriteti, masa të cilat pritet të sjellin efektet e tyre në përmirësimin e cilësisë së trajtimit të dëmeve dhe efektivisht në rritjen e këtij raporti.

Në periudhën janar - korrik 2008, primet e shkruara bruto kapën vlerën prej 4.021.420 mijë lekë, përkundrejt 3.442.749 mijë lekë, të realizuara në të njëjtën periudhë të vitit 2007. Tregu i sigurimeve shënoi një rritje në masën 16.81% nga viti i kaluar, ku 86.51% e kësaj rritje i takon tregut të sigurimeve të Jo Jetës, ndërsa 13.49 % tregut të sigurimeve të Jetës. Për sa i takon rritjes së tregjeve në veçanti, u shënua një rritje në masën 34.92% të sigurimeve të Jetës dhe 15.55 % të sigurimeve të Jo Jetës. Aktualisht në vendin tonë operojnë shoqëritë aksionere Insig, Sigma, Sigal, Intersig, Atlantik, Sigred, Albsig, Interalbanian, Eurosig.