Konferenca e Kryetarëve, lule dhe ballakume për Ditën e Verës

Konferenca e kryetarëve

Konferenca e Kryetarëve të grupeve parlamentare, i cili miratoi kalendarin trejavor të punimeve të Kuvendit të Shqipërisë, u përfshi dje në atmosferën e festës pagane të Ditës së Verës. Nënkryetari i Kuvendit, deputeti i qarkut të Elbasanit, Ardian Turku, u shpërndau nga një ballakume të gjithë anëtarëve të Konferencës së Kryetarëve me rastin e kësaj feste. Si përfaqësues i qytetit ku Dita e Verës festohet më shumë, Turku kishte dje tagrin e të zotit të shtëpisë për të qerasur kolegët e tij, të maxhorancës dhe opozitës me këtë ëmbëlsisë karakteristike të Ditës së Verës, të njohur në të gjithë Shqipërinë. Gjithashtu, kryetarja e Komisionit të Medias, socialistja Valentina Leskaj, deputete e qarkut të Elbasanit, ka marrë një buqetë me lule, të cilën ia kanë dhënë punonjësit e administratës, edhe kjo me rastin e Ditës së Verës. Këto simbole të ardhjes së pranverës janë komentuar me batuta gjatë mbledhjes për një pranverë në marrëdhëniet e mëtejshme mes maxhorancës dhe opozitës.
Debati
Në mbledhjen e Konferencës së Kryetarëve, debati i zhvilluar mes palëve u fokusua te dy projektligje që janë në diskutim në komisionet parlamentare. Maxhoranca kishte përfshirë në kalendarin 3-javor miratimin e projektligjit për regjistrimin e pasurive të paluajtshme, projektligj që po diskutohet momentalisht në Komisionin e Ligjeve. Maxhoranca kishte parashikuar që ky projektligj të futej për miratim në seancën e javës së ardhshme, e cila do të zhvillohet ditën e mërkurë, për shkak se e enjtja është ditë feste. Por opozita e ka kundërshtuar këtë propozim. Sipas kryetarit të Grupit Parlamentar, Ruçi, ky projektligj duhet të marrë kohën e duhur të diskutimit dhe konsultimit në komisione. Nuk duam të miratojmë një ligj të nxituar për të cilin të rikthehemi përsëri e të krijojmë kosto të pariparueshme, mësohet të jetë shprehur kreu i Grupit Parlamentar socialist, Ruçi. Gjithashtu, kryetarja e Komisionit të Medias, Leskaj, ka kërkuar përfshirjen e ligjit për median në kalendarin trejavor të Parlamentit, pasi ai tashti është shumë i vonuar dhe duhet miratuar sa më shpejt. Por maxhoranca nuk e ka pranuar këtë propozim, duke e lënë jashtë kalendarit trejavor si ligjin për median, ashtu dhe ligjin për pasuritë e paluajtshme.

Pasuritë
Komisioni i Ligjeve po punon shumë ngadalë me ligjin për regjistrimin e pasurive të paluajtshme. Në Komisionin Parlamentar të Ligjeve janë miratuar vetëm 14 nene, nga 79 që ka gjithsej ligji i ri. Gjatë seancave të fundit, opozita dhe maxhoranaca është përfshirë në debate lidhur me përbërjen dhe kompetencat e ZRPP-së, për ta shkëputur atë nga lidhja me Kryeministrin, ndërsa opozita ka kërkuar që të ketë në të një anëtar të saj.

Media
Ligji i Mediave vazhdon diskutimin në Komisionin Parlamentar të Medias. Në diskutimin e fundit në këtë komisionin, kryetarja e tij, Valentina Leskaj, tha: Për ligjin e transmetimeve me zë dhe figurë ka kaluar mjaft kohë dhe besoj se tani jemi në pikën e duhur, pasi relatorët kanë përfunduar punën e tyre, të fillojmë shqyrtimin e projektligjit, fillimisht në parim dhe më pas nen për nen. Por, maxhoranca, përmes deputetit Mark Marku, ka akuzuar opozitën për vonesa për shkak të bojkotit të saj të gjatë.