Kongresi amerikan me marrëveshje për buxhetin

Presidenti amerikan, Barack Obama, e ka përshëndetur marrëveshjen e udhëheqësve të Kongresit, e cila shmangu mbylljen e shërbimeve qeveritare, duke thënë se "amerikanët që kanë besime të ndryshme u bënë bashkë".

Obama tha se disa shkurtime do të jenë të dhembshme, por shtoi se Shtëpia e Bardhë i ka mbrojtur projektet prioritare të saj.

Kryetari i Dhomës së Përfaqësuesve, republikani John Bohner, raportoi për arritjen e marrëveshjes dy orë para afatit të fundit, pas të cilit qeveria amerikane do të duhej të ndërpriste një pjesë të madhe të aktiviteteve.

Senati ka miratuar fondet e përkohshme dhe marrëveshja po i paraqitet me shpejtësi Dhomës së Përfaqësuesve për miratim.

Votimi për buxhetin e plotë pritet të mbahet gjatë javës së ardhshme.

Bohner tha se kjo ishte një betejë e gjatë, por më e rëndësishme është të mbahen të ulëta shpenzimet për të krijuar një mjedis më të mirë për hapjen e vendeve të reja të punës.

Udhëheqësi i shumicës në Senat, demokrati Herry Ried, tha se kompromisi ishte i vështirë, por i rëndësishëm për vendin.

Ai tha se popullit amerikan i duhet të bëjë zgjedhje të vështira, por po ashtu edhe ligjvënësve.

Pa arritjen e marrëveshjes, 800 mijë nga 1.9 milionë punonjësit e qeverisë federale do të largoheshin nga puna dhe fondet për trupat me shërbim aktiv do të pezulloheshin.