Korçë, qeveria financon 14 projekte për ujësjellës e kanalizime

Me financimin e qeverisë, pritet të fillojnë brenda 6-mujorit të parë projekte të reja infrastrukture për ujësjellës dhe kanalizime për ujërat e zeza në disa fshatra të rajonit të Korçës. "Me fondin e përgjithshëm rreth 225.7 milion lekë të reja nga buxheti i shtetit, do të financohen 14 projekte të reja në Qarkun e Korçës", tha dje në një konferencë për shtyp, drejtori i investimeve në këshillin e Qarkut, Gjergji Grabocka. Të 14 projektet do të zbatohen në komuna të ndryshme të rajonit të Korçës, 11 prej të cilave, për ujësjellës  dhe 3 për kanalizimin dhe sistemimin e ujërave të zeza, të ndarë në të tre rrethet. Kështu, në rrethin e Korçës përfitues do të jenë fshati Zëmblak në komunën e Pojanit për rrjetin e brendshëm të ujësjellësit, komuna Drenovë në rrjetin shpërndarës të ujësjellësit, komuna Voskop me të njëjtin objekt financimi, komuna Mollaj për linjën e jashtme të furnizimit me ujë, komuna Vreshtas për rrjetin e shpërndarjes së ujësjellësit dhe komuna Liqenas për ndërtimin e një ujësjellësi të ri. Projekte në infrastrukturën e ujësjellësve do të financohen edhe në rrethin e Pogradecit, si në komunën Proptisht dhe Hudënisht, ndërsa në rrethin e Devollit, në fshatin Hoçisht. Në rrethin e Kolonjës do të investohet për rikonstruksionet e ujësjellësve në fshatin Skorovot dhe në  Qinam. Grabocka tha se këto fonde të qeverisë për infrastrukturën e ujësjellësve dhe të kanalizimeve, janë disa herë më të larta nga ato të qeverisjes së mëparshme dhe synojnë të plotësojnë këtë infrastrukturë në pjesën më të madhe të fshatrave të rajonit të Korçës