Kosova shpall Hero policin e vrarë nga serbët

Enver Zymberi, polici i vrarë nga serbët në veri të Kosovës

Prishtinë, 27 korrik 2011, NOA- Është shpallur Hero i Kosovës, polici, i cili u vra nga forcat serbe mbrëmjen e djeshme në veri të vendit.

Presidentja Atifete Jahjaga ka marrë vendimin që Enver Zymberi, polic i njësisë speciale të Policisë së Kosovës, i vrarë në krye të detyrës, të dekorohet me Urdhrin Hero i Kosovës.

Motivacioni është: Për trimërinë dhe përkushtimin e treguar deri në flijim për vendosjen e sundimit të ligjit në tërë territorin e Republikës së Kosovës.
Vendimi u mor në bazë të Kushtetutës së Republikës së Kosovës, neni 84, pika 28, si dhe në bazë të Rregullores për Dekoratat, Urdhrat dhe Titujt e Nderit të Kosovës, që i jep Presidentja e Kosovës dhe Procedurat e Dhënies së tyre, nenet 3 dhe 5.
Mediat kosovare, shkruajnë se Urdhri Hero i Kosovës u jepet qytetarëve të Republikës së Kosovës dhe të huaj, të kohëve moderne, nga Lidhja e Prizrenit e këndej, që kanë bërë vepra trimërie për lirinë dhe pavarësinë e Kosovës.

a.q/NOA