Kosovë, BE-ja akordon fonde në mbështetje të Trepçës

Zyra Ndërlidhëse e Komisionit Evropian në Prishtinë njoftoi sot përmbylljen me sukses të dy projekteve të financuara nga BE-ja në minierën e Stantërgut që i përket kompleksit të minierave të Trepçës në komunën e Mitrovicës.
Përmes fondit prej rreth 1.6 milion euro u kryen punime për stabilizimin e brendësisë së minierës, duke plotësuar hapësirat e zbrazëta të shkaktuara nga kërkimet e vazhdueshme të xeheve si dhe u siguruan pajisje për mbarëvajtjen e punës.
"Projektet që përfshinë ofrimin e kamionëve për transport të hirit atmosferik nga termocentrali i Korporatës Elektrike të Kosovës dhe instalimin e pajisjeve për përpunimin e tij do të rrisin në masë të konsiderueshme stabilitetin e minierës dhe do të përmirësojnë kushtet dhe ambientin e punës. Përveç kësaj, ato do të mundësojnë kërkimin e mëtejshëm të xeheve që do të shtojë prodhimin dhe do të krijojë vende të reje pune në të ardhmen", njoftoi Zyra Ndërlidhëse e Komisionit Evropian në Prishtinë.
Këto projekte janë pjesë e programit të BE-së, me vlerë prej 5 milionë euro. Ky program ka ofruar mbështetje infrastrukturore për komunën e Mitrovicës dhe të Zveçanit (2.5 milionë euro), dy projekte në minierën e Stantërgut dhe një projekt për përtëritjen e rafinerisë së plumbit në Zveçan (1 milion euro).
Trepça është një minierë e lashtë plumbi, zinku, argjendi, kristaleve dhe mineraleve të ndryshme në Kosovë. Në kohën e shtetit Jugosllav, Trepça kishte shumë famë dhe ishte një ndër motorët e ekonomisë jugosllave.
Para luftës Trepça numëronte rreth 22 000 punëtorë. Produktet kryesore ishin xehet dhe koncentrati i plumbit dhe zinkut, plumbi i rafinuar dhe aliazhe te plumbit, argjend, ari, bizmut, zink elektrolit dhe kadmium, acid sulfurik, acid fosforik, plehra superfosfate, akumulatorë, bateri nikelkadmiumi, municion të gjuetisë, gypa dhe tel plumbi,etj.