Kosovë, Presidentja Jahjaga rikthen Kodin Penal në Kuvend

Presidentja e Kosovës Atifete Jahjaga gjatë javës së ardhshme do t`ia kthejë Kuvendit Kodin Penal dhe do të kërkojë riformulimin e dy neneve të kontestuara. Sipas gazetës “Express” , janë kontestuar nenet 37 dhe 38 që kanë të bëjnë me përgjegjësinë e gazetarëve.
 

“Presidentja nuk do të kërkojë heqjen e tërësishme të neneve 37 dhe 38. Përgjigjja e Jahjagës është që ato nene të riformulohen”, ka thënë një zyrtari i Presidencës, pa dashur t’i përmendet emri.
 

Ndërkohë, Presidentja gjatë javës së kaluar ka takuar përfaqësuesit e gazetarëve, të cilët i kanë kërkuar të rikthejë Kodin Penal në Kuvend.
 

Por, nuk janë vetëm gazetarët që kanë bërë presion mbi Presidenten. Zyrtarë të Presidencës kanë thënë se edhe përfaqësuesit ndërkombëtarë në Kosovë i kanë kërkuar Jahjagës që të rikthejë Kodin në Parlament dhe të kërkojë qartësimin e neneve që kanë të bëjnë me mediat.