Krespo: “Synojmë vendin e parë në grup”

Interi pret sot në "San Siro" kampionen e Holandës, PSV Eindhoven, në ditën e dytë të vlefshme për fazën e grupeve në Ligën e Kampioneve. Zikaltërit pësuan një humbje dramatike në Stamboll me Fenerbahcen, por përballë skuadrës së udhëhequr nga Ronald Koeman, djemtë e Roberto Mancinit do të kërkojnë më ngulm fitoren e parë dhe tri pikët e para.
FRIKA - Por, nëse në kampionatin italian, fitorja madhështore ndaj Romës (1-4) dha sinjalin më të mirë se zikaltërit janë sërish favoritët kryesore për fitimin e titullit, në Europë ata duhet të harrojnë dicka thelbësore, që ka të bëjë me mentalitetin: frikën. Atë që shkaktoi edhe humbjen në Stamboll këtë sezon. Zikaltërit duhet të harrojnë edhe Romën, pasi në Europë, futbolli është tjetër gjë. Interi ka nevojë për fitoren e parë për të dalë nga situata e komplikuar në klasifikimin e Grupit G, kur PSV dhe Fenerbahce, janë përpara tij në kuotën 3. Pikërisht për këtë arsye, Interi në versionin europian duhet të fitojë në mënyrë absolute më holandezët.
KRESPO – Sulmuesi i Interit është i bindur se skuadra e tij është përmirësuar shumë qysh nga disfata me Fenerbahcen. Fitorja 4-1 me Romën i ka rigjeneruar zikaltërit: "Ne jemi ekstremisht të bindur se jemi të fortë", - tha sulmuesi argjentinas, Hernan Krespo. "Por, e dimë nga ana tjetër, se këtë duhet ta provojmë në fushë. Ne luajtëm shumë mirë kundër Romës, dhe këtë duhet ta përsërisim edhe kundër PSV-së. Ne dëshirojmë të kualifikohemi si të parët në grupin tonë dhe ne kemi nevojë të luajmë mirë të martën".
INTERI - Llogaritë për teknikun zikaltër janë të vështira: Kordoba, Kruz, Maikon dhe Burdiso janë ende të skualifikuar; Adriano e Sezare nuk janë në listë, Materaci, Vieira dhe Dakurt janë të dëmtuar; i rikuperuar është Civu, ndërkohë që Ibrahimovic duhet të shtrëngojë dhëmbët pas goditjes së pësuar në këmbën e majtë, cka e detyroi edhe të largohej para kohë nga ndeshja me Romën të shtunën e kaluar. Suedezi pritet të bëjë dushen sulmuese së bashku me Krespon, gjithmonë deciziv.
KUNDËRSHTARËT – PSV ka humbur lidershpin në Eredivisie (kampionati holandez) gjatë fundjavës kur barazoi jo pa vuajtje në fushën e Nak Bredas, por bardhekuqtë mbërrijnë në "San Siro" me besim, të ndërgjegjshëm se nuk kanë asgjë për të humbur dhe më dyshimin e vetëm të qendërmbrojtësit portugez Da Kosta (probleme me gjurin). Në bankinën holandeze është një "Rambo", Koeman, një nga ata që është mësuar të bëjë shakara të tmerrshme.