Krimi kontrollon rrugët më keq se në 97-ën/ Maskat plagosin pesë persona gjatë një grabitje

Një ditë më parë një familje nga Ulqini i Malit të Zi, denoncoi një rast të rëndë grabitje.

Ata ishin grabitur në Rrugën e Kombit. Policia as kishte lëvizur gishtin ndaj denoncimit.

Një ditë më pas, një tjetër ngjarje e rëndë shënohet në Pukë.

Një tentativë grabitje me armë në rrugë ka shkaktuar pesë të plagosur rëndë, mes tyre edhe një fëmijë 5 vjeç.

Ngjarja ka ndodhur në Qafë Qelë të Pukës në orët e para të mëngjesit.

Tre grabitës me maska i kanë dalë përpara makinës ku udhëtonin Astrit dhe Valbona Kopani, Mirjeta dhe Zamir Xhaferraj si dhe dy fëmijët e tyre.

Mendohet se drejtuesi i mjetit, Astrit Kopani nuk u ka ndaluar grabitësve, të cilët kanë qëlluar me armë në drejtim të makinës.

Si pasojë kanë mbetur të plagosur pesë persona në makinë, mes tyre edhe një vajzë 5 vjeç./ep