Kriza e CEZ me qeverinë. Berisha kokë më kokë me kryeministrin çek

Kryeministri i Çekisë, Petr Necas (Petr Neas), do të vizitojë sot Shqipërinë, i ftuar nga kryeministri Sali Berisha.

Kryeministri çek Necas do të pritet nga kryeministri Berisha, me një ceremoni zyrtare në kryeministri dhe më pas të dy kryeministrat do të zhvillojnë një takim tete a tete, i cili do të pasohet nga bisedimet mes dy delegacioneve, të kryesuara nga dy kryeministrat.

Në qendër të bisedimeve pritet të jetë fati i kompanisë CEZ, e cila është futur në një spirale borxhesh të pashlyera nga qeveria duke bllokuar seriozisht funksionimin e saj.

Në përfundim të tyre, kryeministri Berisha dhe kryeministri Necas do të dalin në një konferencë të përbashkët për median.

Gjatë vizitës së tij zyrtare në Tiranë, kryeministri çek Petr Necas do të pritet në një takim, nga Presidenti i Republikës, Bamir Topi, si dhe do të marrë pjesë, së bashku me kryeministrin Berisha, në ceremoninë e mbylljes së Forumit ekonomik çeko-shqiptar.