Krizë, edhe La Liga nuk shpenzon si dikur

Derisa sheikët shpenzojnë në Francë dhe Angli, Italia është më e përqendruar të shesë. Kurse Spanja, që deri vonë ishte një prej ligave me investimet më të mëdha gjatë afateve kalimtare për futbollistë, deri më tani gjatë kësaj vere ka qëndruar mjaft e përmbajtur, shkruajnë mediumet italiane.

Jordi Alba është i vetmi përforcim me çmim të konsiderueshëm (14 milionë euro) i zyrtarizuar deri më tani gjatë kësaj vere në La Liga. Ai braktisi Valencian për të kaluar në Barcelonë. Bëhet fjalë për rikthimin e tij në klubin e fëmijërisë. “Me rëndësi është të mbajmë yjet”.

Ky mund të jetë qëndrimi i gjigantëve spanjollë si Real Madridi dhe Barcelona. Dhe të tillë janë mjaft nga Lionel Messi e Cristiano Ronaldo tek të tjerët, përfshirë Iker Casillasin, Xavi Hernandezin e Andres Iniestan. Kjo ‘heshtje’ mund të thyhet vetëm nga Reali, që spekulohet se është i gatshëm të ofrojë 40 milionë euro për mesfushorin e Tottenhamit, Luka Modric.

Por, sipas gjendjes aktuale, kriza globale financiare ndihet edhe në Spanjë. Futbollisti i dytë më i shtrenjtë i kësaj vere në Spanjë është Joao Pereira, i cili iu bashkua Valencias për 3.7 milionë euro.