Krizë totale në Liri
Liria po e përjeton një edicion shumë të vështirë. Skuadra prizrenase është zhytur në një krizë me dy tehe. Përveç rezultateve të dobëta nëpër të cilat po kalon, kriza e madhe financiare po ia shton dhimbjet skuadrës prizrenase.
Kanë kaluar katër muaj që futbollistët e saj nuk kanë marrë paga. E kjo ka bërë që morali të bie te bardhezinjtë, të cilët nuk kanë mundur t’i fitojnë më shumë sesa dy ndeshje, prej katërmbëdhjetë sa i ka zhvilluar deri më tani.
Fitoren e fundit bardhezinjtë e kanë shënuar para pesë javësh në duel me Besën, edhe atë pas një kohe të gjatë. Ndërsa, në pesë duelet e fundit i ka regjistruar tri barazime e dy humbje. Kështu, me vetëm 12 pikë të tubuara, Liria pozicionohet në vendin e parafundit të renditjes tabelore.
E për këtë bilanc negativ të rezultateve, trajneri Skënder Kapra ia hedh fajin faktit se Liria të gjitha ndeshjet është duke i zhvilluar jashtë Prizrenit, ngase stadiumi i saj është në gjendje të rëndë infrastrukturore, gjë që e ka shty Federatën e Futbollit të Kosovës ta pezullojë atë.
“Përveç ndeshjeve si mysafirë, ne edhe ndeshjet si vendës po i luajmë jashtë qytetit tonë. Njësoj sikurse mysafirë. Kjo ka ndikuar jashtëzakonisht shumë. Unë jam më se i bindur se sikur ndeshjet si vendas t’i luanim në stadiumin tonë në Prizren, do të ishim kah mesi i tabelës”, thotë Kapra.
Ai pranon se edhe mosdhënia e pagave futbollistëve nga ana e kryesisë së klubit e ka ndihmuar krizën e rezultateve ta godasë edhe më fort ekipin e tij.
“Nuk mund ta mohoj këtë. Sigurisht se te sportistët stimulimi çon peshë. Por, kryetari u ka premtuar futbollistëve se të gjitha obligimet do t’i kryejë ndaj tyre, por i ka lutur të kenë mirëkuptim”, theksoi ai.
“Por, edhe sikur obligimet të kryheshin me kohë ndaj futbollistëve dhe të paguheshin me shuma shumë të mëdha, mungesa e stadiumit tonë prapëseprapë do ta çonte në krizë rezultatesh. Mungesa e terrenit ndikon jashtëzakonisht shumë, për këtë të jeni të bindur”, shtoi Kapra.
Megjithatë, trajneri prizrenas shpreson që Komuna e qytetit të lashtë shumë shpejt do ta ndihmojë Lirinë rreth rregullimit të infrastrukturës në stadiumin ‘Përparim Thaçi’, në mënyrë që ky ekip ndeshjet e stinorit pranveror t’i luajë në folenë e vet. Kapra thotë se nëse kjo realizohet, atëherë ekipi i tij nuk do ta ketë të vështirë të mbijetojë në Superligë. Në të kundërtën, statusi i anëtarit të elitës Lirisë do t’i rrezikohet shumë seriozisht.