Kryebashkiaku inspekton punimet ne rrethrrotullimin e doganes

Punimet për ndërtimin e korsive shtesë në rrethrrotullimin e doganës do të përfundojnë brenda datës 15 gusht.
Kështu ka deklaruar kryebashkiaku i Tiranës, Lulzim Basha gjatë inspektimit të punimeve që kanë nisur që nga fundi i muajit qershor.
Sipas qytetarit të parë të Tiranës kjo ndërhyrje emergjente do t’i japë zgjidhje problemit të vjetër të bllokimeve të shpeshta të trafikut duke normalizuar lëvizjen e rreth 25 mijë automjeteve që hyjnë e dalin çdo ditë nga kryeqyteti.
“Kjo ndërhyrje konsiston në shtimin e korsive djathtas, ndërtimin e trotuareve si dhe rritjen e sigurisë së kalimit të këmbësorëve, duke ndërtuar kangjellat mbrojtëse dhe për disiplinimin e tyre në kalimet në vijat e bardha. Gjithashtu, do të pajiset me sinjalistikës vertikale, horizontale dhe informuese, si në brendësi të tij, ashtu edhe jashtë rrethrrotullimit. Do të ndalohet qëndrimi i të gjithë mjeteve, 150 metra në çdo drejtim hyrës-dalës dhe përpunimi i çdo pasagjeri nga çdo mjet, 100 metra nga diametri i jashtëm”, vuri në dukje Basha. 
Sipas kryebashkiakut pas përfundimit të unazës së madhe do të shihet nëse do të ketë nevojë për ndërhyrje të tjera në rrethrrotullimin e doganës. 
Kjo ndërhyrje ka një kosto prej 54 milion lekësh të reja dhe vjen si kontribut i Bashkisë së Tiranës dhe 2 kompanive private.
Kryebashkiaku Basha deklaroi se puna do të vazhdojë dhe pas përfundimit të investimit me disiplinimin e parkimeve të automjeteve dhe lëvizjes së këmbësorëve përqark rrethrrotullimit të doganës. Këto ndërhyrje emergjente do të shtrihen edhe në rrugë të tjera për ti dhënë frymëmarrje më të madhe kryeqytetit.