Kryeministri Berisha merr urime të shumta për mandatin e dytë qeverisës

Gjatë këtyre ditëve Kryeministri Berisha ka marrë një sërë telegramesh dhe emaile urime për fitoren e zgjedhjeve parlamentare dhe formimin e koalicionit qeverisës.
Kryeministri Sali Berisha ka marrë një telegram urimi nga Kryetari i Partisë Demokratike Shqiptare në Maqedoni, zoti Menduh Thaçi, me rastin e fitores në zgjedhjet parlamentare. Në urimin e tij, zoti Thaçi u shpreh:

I nderuar z.Kryeministër,

Më lejoni që në emrin tim personal dhe në emër të Partisë Demokratike Shqiptare në Maqedoni të Ju përgëzoj për organizimin e zgjedhjeve të qeta, të drejta dhe demokratike. Shqipëria si anëtare e NATO-s dhe vend kandidat për Bashkimin Evropian, jo vetëm që plotësoi të gjitha standartet demokratike evropiane, por edhe një herë ju tregoi të gjithë skeptikëve dhe armiqve të Shqipërisë, se shqiptarët janë popull me virtyte demokratike, se dinë të kultivojnë demokracinë dhe dinë të organizojnë zgjedhje të lira dhe demokratike.
Po ashtu, ju uroj për fitoren e koalicionit të djathtë, të cilin zoti Kryeministër ju e udhëhiqni, me çka shqiptarët i bashkëngjiten shteteve më demokratike evropiane.

Z.Kryeministër,

Përgëzimet e mia të sinqerta për gatishmërinë e formimit të koalicionit qeveritar në bazë të gjerë politike, së bashku me Kryetarin e Lëvizjes Socialiste për Integrim, z.Ilir Meta.

Z.Kryeministër,

Ju dëshiroj shëndet dhe qëndrueshmëri në rrugën për integrim sa më të shpejtë të Shqipërisë në Unionin Evropian, ashtu si vepruat edhe për integrimin e Shqipërisë në NATO.

Edhe kryetari i Partisë Bashkimi Demokratik për Integrim në Maqedoni zoti Ali Ahmeti, i ka dërguar një telegram urimi kryeministrit Berisha, duke u shprehur:

I nderuari z.Berisha

Ndjej kënaqësi të veçantë që me rastin e përfundimit të procesit zgjedhor në Republikën e Shqipërisë të Ju përgëzoj për suksesin e arritur. Zgjedhjet e fundit parlamentare të zhvilluara më 28 qershor paraqesin edhe një dëshmi se Republika e Shqipërisë hapëron guximshëm në rrugën drejt përmbushjes së standarteve evropiane. Votuesit shqiptarë pavarësisht se për kënd u përcaktuan, votuan për dy sloganet kryesore që reflektonin në ndryshime. Votuan për ardhmërinë evropiane.

Deklarimi për formimin e koalicionit qeveritar shpreh gatishmërinë e subjekteve politike për të vënë interesin shtetëror para intereseve partiake. Ky përcaktim dëshmon pjekurinë politike të udhëheqësve partiakë për të anavsuar të përgjitshmen ndaj individuales.

Me bindjen e plotë se qeveria e re do të dijë të çojë përpara aspiratat e popullit të Shqipërisë, Ju uroj sukses në rrugën drejt Evropës.

Një telegram urimi ka mbërritur edhe nga kryetari i Partisë Demokracia e Re në Maqedoni, Imer Selmani, i cili në fjalën e tij është shprehur:
Kam bindjen që bashkëpunimi PD-LSI, do të sinkronizojë në mënyrën më të mirë të mundshme aspiratat euro-integruese dhe zhvillimore të Shqipërisë. Në këtë kuadër konsideroj se Qeveria e ardhshme do të ruajë kursin politik integrues dhe përfundimisht do t’i japë Shqipërisë vendin e merituar në mesin e shteteve evropiane në Bashkimin Evropian.

Kryeministrin Berisha, për mandatin e dytë qeverisës, e ka uruar edhe kryetari i Partisë Ekologjike të Kosovës, Arif Krasniqi. Në fjalën e tij ai nënvizoi se:

Të jem i sinqertë, neve fitorja juaj nuk na habiti, ajo ishte e pritur. Ishte e pritur sepse Qeveria të cilën e udhëhoqët Ju z.Kryeministër, kishte arritur rezultate marramendëse për Shqipërinë dhe shqiptarët.

Edhe kryetari i Partisë për Veprim Demokratik Riza Halimi, i ka dërguar një letër urimi kryeministrit Berisha, ku shprehet:

I nderuar Z.Berisha,

Më lejoni që në emrin e Partisë për Veprim Demokratik dhe në emrin e koalicionit të Shqiptarëve në Luginën e Preshevës, t’Ju urojmë për zgjedhjet demokratike dhe dinjitoze, që u zhvilluan të dielën e kaluar më 28 qershor në Republikën e Shqipërisë, ku votuesit shqiptarë dhe partitë politike pjesëmarrëse në këtë garë treguan pjekurinë politike dhe vlerat e tyre qytetëruese europiane

Me këtë rast duam t’ju urojmë edhe për fitoren e partisë tuaj dhe të koalicionit demokratik në këtë garë mjaft të rëndësishme për të ardhmen e ndritur të shtetit dhe popullit shqiptar.