Kryeministri Berisha pret përfaqësuesit e “General Elektric”.

Kryeministri Berisha priti në një takim përfaqësuesit e “General Elektric”, të kryesuar nga Guiseppe Recchi, President i Koorporatës për Europën Juglindore.

Kompania “General Elektric” shprehu interes për të investuar në projekte të mëdha : në  infrastrukturë, energjitikë, përfshirë edhe energjinë nukleare, në aviacion, porte dhe në fushën e mjekësisë.

Gjithashtu kjo Koorporatë shprehu mbështetjen  e grupit të saj financiar për të investuar në projekte të ndryshme në Shqipëri.

Kryeministri Berisha  falenderoi përfaqësuesit e “General Electric”  për interesin dhe vëmendjen që i kanë kushtuar Shqipërisë, si një vend i mundshëm për shtrirjen e aktivitetit të  këtij gjiganti të industrisë dhe prezantoi fushat e mundshme për investime.

Duke folur për zhvillimet në fushën e energjisë, Kryeministri tha se ndërtimi i hidrocentraleve, termocentraleve, impianteve të erës dhe atyre nukleare, përbëjnë në të ardhmen një front të madh pune për këtë gjigant në industri.

Zoti Berisha  i informoi edhe për proceset e garave të tenderave që do të hapen për konçensionet e porteve, hidrocentraleve dhe rrugëve.

Gjatë bashkëbisedimit, Kryeministri bëri një ekspoze të zhvillimeve të vrullshme në vend , në  dy vitet e fundit dhe i orientoi investitorët për financime të projekteve të mëdha si ato në fushën e çimentos, porteve etj.