Kryeministri serb Koshtunica jep dorëheqjen, shkaku Kosova
Kryeministri konservator serb Vojislav Koshtunica ka dhënë dje dorëheqjen dhe ka bërë thirrje për zgjedhje të reja parlamentare në muajin maj. Dorëheqja e tij vjen pas krizës brenda qeverisë serbe dhe deklaratës së tij se nuk kishte më besim te partnerët e tij proeuropianë, Partinë Demokratike dhe Partinë “G 17 plus”.
“Qeveria e Serbisë nuk ka më politikë të unifikuar mbi çështjen që ka të bëjë me të ardhmen e këtij vendi, Kosovën, si pjesë e Serbisë”, - ka thënë Koshtunica. “Qeveria e Serbisë nuk funksionon më. Ky është fundi i qeverisë dhe ne duhet t'ia kthejmë mandatin popullit”, - u shpreh Koshtunica, duke bërë thirrje që zgjedhjet e parakohshme të mbahen më 11 maj. Ai ka sqaruar se arsyeja e mbledhjes së qeverisë ishte marrja e vendimit për shpërbërjen e parlamentit dhe caktimin e zgjedhjeve parlamentare dhe ky veprim erdhi pas ndarjes me partnerin liberal të koalicionit qeveritar, Presidentit të Republikës Serbe, Boris Tadiç. “Ky ishte shkaku që e thirra këtë mbledhje të qeverisë për të marrë vendimin që parlamenti të shpërbëhet dhe të caktohen zgjedhjet parlamentare”, - tha Koshtunica. Megjithatë, sipas Kushtetutës serbe, të drejtën për të shpërndarë parlamentin e ka presidenti i Serbisë në bazë të propozimit të qeverisë. Para disa ditësh, ministrat pro-perëndimorë të kabinetit të kryeministrit Koshtunica hodhën poshtë kërkesat e nacionalistëve që Serbia të hiqte dorë nga përpjekjet për anëtarësim në Bashkimin Europian për shkak se vendet e Bashkimit Europian kanë njohur pavarësinë e Kosovës. Partitë pro-europiane në koalicionin qeverisës janë shprehur se e ardhmja e Serbisë nuk do të duhej të varet nga statusi i Kosovës. Pas shpalljes së pavarësisë së Kosovës, situata në Serbi ishte e trazuar. Autoritetet e këtij vendi me në krye kryeministrin Koshtunica ishin shprehur se fajtore dhe përgjegjëse për shpalljen e pavarësisë dhe pranimin e shtetit të ri ishin SHBA-të dhe vendet perëndimore. Për këtë arsye, protestues të shumtë shkatërruan dhe dogjën Ambasadën e SHBA-ve dhe të tjera në Beograd. Shtetet e Bashkuara akuzuan si përgjegjësin kryesor kryeministrin Koshtunica dhe forcat e policisë, të cilat me qëllim nuk ndërhynë për të normalizuar gjendjen. Dorëheqja e kryeministrit serb u bë e ditur gjatë një konference urgjente për shtyp.
10 Mars 2008