Kryetarja e Kuvendit takon ekspertët e OSBE/ODIHR, Jessie Pilgrim dhe Richard Lappin

Topalli: 53 rekomandimet e ODIHR, baza e reformës zgjedhore

Dy ekspertët e OSBE/ODIHR, Jessie Pilgrim dhe Richard Lappin, të cilët po zhvillojnë një vizitë në Shqipëri, për t’i dhënë asistencë teknike Komisionit të Posaçëm Parlamentar për Reformën Zgjedhore, u pritën dje në një takim nga Kryetarja e Kuvendit, Jozefina Topalli. Duke falenderuar përfaqësuesit e ODIHR-it për kontributin dhe mbështetjen dhënë Shqipërisë për reformën elektorale, Topalli vlerësoi përfundimet e Raportit e ODIHR, që i cilësoi zgjedhjet e fundit “kompetitive dhe transparente”. “Këto zgjedhje tha Kryetarja e Kuvendit, ishin më transparentet dhe u zhvilluan me një sistem demokratik zgjedhor të propozuar nga  PS e të miratuar me konsensus të plotë nga socialistët e demokratët në Parlament. Po ashtu, opinioni i përbashkët i ODIHR-it dhe  Komisionit të Venecias përbën një dokument ligjor profesional i cili shërben si plan pune në zbatimin e 53 rekomandimeve për zgjedhjet, të cilat janë çështje standardi dhe jo çështje partiake”- u shpreh kryetarja e Kuvendit. Eksperti i ODIHR-it, z. Jessie Pilgrim, një njohës i mirë i çështjeve zgjedhore dhe i proceseve elektorale në vendin tonë tha se “Shqipëria ka një progres shumë evident përsa i përket kuadrit ligjor dhe rritjes së standardeve zgjedhore”. Ekspertët e ODIHR thanë se “jemi maksimalisht të gatshëm për të asistuar në reformën zgjedhore në mënyrë që ajo të përfundojë në kohën e duhur”. Ata shprehën bindjen në cilësinë e lartë të ekspertizës shqiptare. Kryetarja e Kuvendit, Jozefina Topalli dhe ekspertët e ODIHR-it u shprehën optimistë për një reformë zgjedhore cilësore, e cila do të jetë materializim i rekomandimeve të OSBE/ ODIHR-it, e do të miratohet brenda afatit të duhur kohor.
Partitë e vogla, takim me ekspertët e ODIHR/Partitë e vogla jo-parlamentare kanë shprehur qëndrimin e tyre, në lidhje me rishikimin e ligjit elektoral, gjatë takimit me ekspertët që OSBE/ODIHR, që ndodhen në vendin tonë. Krerët e këtyre forcave politike kanë kërkuar nga ekspertët e ODIHR, që të influencojnë tek komisioni i reformës zgjedhore, në mënyrë që të merren parasysh kërkesat e tyre. Ekspertët e Zyrës për Institucione Demokratike dhe të Drejtat e Njeriut (ODIHR), ka mbërritur në vendin tonë, me ftesë të Kuvendit, për të diskutuar mbi reformën zgjedhore dhe për të ofruar asistencën për reformën zgjedhore.