Kush tha që parlamenti nuk është i pavarur?!

Para pak ditësh, përfaqësuesit demokratë edhe bënin ndonjë ironi në Këshillin e Legjislacionit, i mbledhur për të shqyrtuar nismën e Partisë Socialiste për ndryshimet kushtetuese. Me fjalë të tjera, mundoheshin sikur janë të pavarur. Në mbledhje u vendos që të shtyhet për dy javë diskutimi i ndryshimeve kushtetuese. Socialistët e shprehën irritimin e tyre fillimisht me deputetin Pandeli Majko, më pas me deputetin Fatmir Xhafaj.

Por ka mjaftuar një fjalë e kryeministrit Sali Berisha në mbledhjen e sotme të grupit parlamentar dhe e gjithë rrjedha ka ndryshuar. Berisha kërkoi që nisma e PS të shqyrtohet me shpejtësi dhe nuk kishte si të ndodhte ndryshe. Këshilli i Legjislacionit d të mblidhet nesër për të diskutuar këtë nisëm, e cila ashtu siç është shprehur edhe vetë Berisha, nuk do të miratohet. Por të paktën do të shkojë në seancë. Edhe socialistët siç duken kanë rënë dakord që kjo është vetëm një manovër politike dhe po pranojnë të diskutojnë për të treguar se duan reformë në drejtësi. Ata kanë deklaruar se do e miratojnë ligjin për kufizimin e imunitetit pa asnjë kushtëzim.

Në njoftimin e Kuvendit përcaktohet se këtë të martë në orën 10:30 do të zhvillohet seanca e dytë e shqyrtimit të iniciativës së PS-së. Po ashtu bëhet e ditur se Këshilli do të zhvillojë seancën dëgjimore me grupet e interesit për paketen e PS, ditën e mërkurë në orën 09:30. Mbledhja e Këshillit të Legjislacionit thuhet në njoftim, do të zhvillohet në përputhje me rregulloren e Kuvendit.

Unë e mirëpres këtë vendim të PS-së dhe ajo që do të ftoja është që të fillojnë dëgjimet. Ne i kemi shprehur qëndrimet tona dhe ato janë të qartë por meqë shtatori është një muaj, dhe është një afat kritik për vlerësim e arritjes së Shqipërisë unë do t`ju lutesha që të bëjmë gjithçka për të afruar datën e votimit në parlament të ndryshimit të heqjes së imunitetit dhe ligjet që janë propozuar nga PS-ja. Në rast do të mund që kjo proces të kompletojë brenda afatit kohor ky do të ishte lajmi më i mirë që ne mund tu dërgonin partnerëve ndërkombëtarë, deklaroi sot kryeministri Berisha.