Kuvendi, debate për privatizimin e Albpetrolit

Kuvendi, foto arkiv

Ashtu siç pritej, privatizimi i Albpetrolit ka ngjallur debate maxhorancë-opozitë në seancën e sotme plenare. Deputeti socialist Erion Braçe, ka kërkuar përgjigje për një sërë pyetjesh drejtuar ministrit të Ekonomisë, Nasip Naço.

Braçe kërkoi përgjigje në lidhje me sasinë e naftës që përfiton kompania Albpetrol në vit dhe vlerën monetare të paktën për 3 vitet në vijim. “Sa janë respektuar marëveshjet e hidrokarbureve të kompanisë albpetrol, dhe çfarë qëndrimi ka mbajtur ministria?” iu drejtua Braçe ministrit Naço.

Ndërsa sipas kryetarit të Komisionit të ekonomisë, Edmond Spaho, Albpetrol nuk është ndonjë pasuri kaq e madhe dhe si e tillë duhet nxjerrë në shitje me vlera reale.  ”Kemi eksperienca që nuk kanë arritur të privatizohen pasi i ka rënë vlera e ndërmarrjes. Prandaj duhet që ndërmarrjen ta nxjerrim në vlera reale, tha Spaho.

* * *

Opozita ka deklaruar se do të votojë kundër privatizimit të Albpetrolit.

Socialistët e kanë kundërshtuar fuqishëm privatizimin e kompanisë së vetme të njerrjes së naftës, duke e argumentuar qëndrimin e tyre me mungesën e plotë të transparencës.

Një tjetër projektligj që nuk pritet të gjejë konsensusin e socialistëve është edhe ai Për regjistrimin e pasurive të paluajtshme, i miratuar disa ditë më parë në Komisionin e Ekonomisë. Deputetët e eopozitës janë shprehur se ndryshimet në këtë ligj do ti japin qeverisë pushtet absolut

Gjithashtu në rendin e ditës është parashikuar edhe projektligji Për gjykimin e Mosmarrëveshjeve Administrative dhe Organizimin e Drejtësisë Administrative, i cili kërkon shumicë të cilësuar.

Diskutimet për Gjykatën Administrative u shtynë një ditë më parë nga Komisioni i Ligjeve, me qëllim ripërcaktimin e termave të disa neneve të projektiligjit. Ndërkohë, një javë më parë, projektligji u miratua në komision me votat e maxhorancës dhe opozitës. / G.N.