LONDËR – Starmer: BM-ja duhet të “ecë më shpejt” me rritjen e shpenzimeve të mbrojtjes
LONDËR, 16 shkurt /ATSH-DPA/- Britania e Madhe duhet të “ecë më shpejt” me rritjen e shpenzimeve të mbrojtjes, tha sot kryeministri britanik Keir Starmer përpara përvjetorit të katërt të pushtimit të plotë rus në Ukrainë.
Starmer është zotuar të rrisë shpenzimet e mbrojtjes në 2,5% të PBB-së vitin e ardhshëm dhe në 3% pas zgjedhjeve të ardhshme.
Sipas BBC, kryeministri britanik ka raportuar se po shqyrton mundësinë e përshpejtimit të objektivit prej 3% deri në vitin 2029, pasi kreu i forcave të armatosura të Britanisë së Madhe paraqiti riarmatimin si një “arsye morale”.
I pyetur në lidhje me raportet në një aktivitet sot në Londër, Starmer nuk konfirmoi nëse po shqyrtonte përshpejtimin e objektivit, por tha se Evropa duhej të avanconte kur bëhej fjalë për mbrojtjen dhe sigurinë.
“Kemi një kërcënim agresioni rus. Brenda pak ditësh është përvjetori katërvjeçar i fillimit të konfliktit në Ukrainë”, tha Starmer.
“Ne duam një paqe të drejtë dhe të qëndrueshme, por kjo nuk do ta shmangë kërcënimin rus, dhe duhet të jemi vigjilentë ndaj kësaj, sepse kjo do të ndikojë në çdo person në këtë vend, kështu që duhet të përparojmë”, shtoi ai.
“Kjo do të thotë që, lidhur me shpenzimet e mbrojtjes, duhet të ecim më shpejt”, theksoi kryeministri britanik.
Starmer shtoi se, përveç rritjes së shpenzimeve, përmirësimi i mbrojtjes së Britanisë së Madhe përfshinte edhe bashkëpunimin me vendet me të njëjtat mendime, veçanërisht në Evropë – pas thirrjes së tij në Konferencën e Sigurisë në Mynih për një ndryshim drejt një NATO-je më evropiane.
Ndërsa qeveria e Britania e Madhe ka njoftuar planin e saj për të shpenzuar më shumë për mbrojtjen, ajo ende nuk e ka publikuar planin e saj të vonuar të investimeve në mbrojtje – që përcakton se si do t’i përmbushë angazhimet e saj.
Raportet se objektivi i shpenzimeve prej 3% mund të përshpejtohet vijnë pasi shefi i Shtabit të Mbrojtjes, shefi i Forcave Ajrore, Marshall Richard Knighton, lëshoi një thirrje të përbashkët me homologun e tij gjerman për një ndryshim hap pas hapi në mbrojtjen dhe sigurinë e dy vendeve. //a.i/